Arbëri

Zemaj thotë se janë të gatshëm të menaxhojnë variantin e ri të koronavirusit

Prishtinë, 7 shkurt (Ekonomia Online) - Ministri në detyrë i Shëndetësisë, Armend Zemaj, vlerëson se situata me pandeminë është menaxhuar në mënyrë efikase dhe mund të konsiderohet e qetë. Ai ka kërkuar që të vazhdohet me disiplinë.

Ai ka thënë se me kufizimet që po aplikohen, po pretendojnë ta mbajnë gjendjen stabile. Prishtina. Fushë-Kosova, Suhareka e Zveçani janë komunat që ende gjenden në zonën e kuqe.

“E kemi një situatë të qetë pandemike. Shqetësimi ka qenë për rastet e reja të cilat kanë rezultuar me COVID-19, por edhe variantin e ri që u paraqit në Britaninë e Madhe. Kështu që po kërkojmë të vazhdohet me disiplinë. Eventualisht nëse krijohen kushte dhe rrethana që mund të ecim me një lirim te këto zona. Efekti i masave u pa. Pothuajse shumica e aktiviteteve ekonomike janë të lejuara. Me këto kufizime po pretendojmë që ta mbajmë gjendjen stabile, numrin e infeksioneve dhe numrin e rasteve spitalore. Për momentin nuk besojmë që do të lëvizim shpejt me lirim të masave”, ka thënë Zemaj për Ekonomia Online.

Ai shton se ka vënë në dispozicion gjitha mekanizmat për menaxhimin e variantit të ri të koronavirusit.
 

“IKShPK-ja është vënë në garanci edhe në klinikat tona në izolimin e këtij virusi të ri në aspektin e shpërndarjes kontakteve edhe në aspektin shkencor edhe të trajtimit të saj përmes testimeve, kështu që me kapacitete të cilat i kemi shtuar, por edhe me njohuritë e reja të cilat i kanë vetë profesionistët shëndetësorë, po tregojnë që mund ta mbikëqyrim ta kontrollojmë, por të kërkohet kujdes i shtuar edhe në këtë pjesë. Ne kemi marrë vendime menjëherë për mbylljen e kufijve ajror me Britaninë e Madhe po shpresojmë që në vendet e rajonit mund të marrim masa kufizuese me vendet të cilat mund të paraqesin raste në rritje të këtij variant të virusit. Është vetëm variant që në shpërndarje e ka efektin më të madh. Ndërsa trajtohet njëjtë edhe në aspektin klinik”, tha Zemaj.

Ai shtoi se jo vetëm për qytetarë, por ka pasur gjoba edhe për partitë politike, andaj ai thotë se duhet të zgjerohet mbikëqyrja në të gjitha qendrat.

“Po të njëjtë janë qytetarët edhe partitë politike edhe aktivistë. Edhe qytetarët që nuk janë pjesë e subjekteve politike ne duhet të kemi kujdes madje kemi bërë thirrje që të shtohet kujdesi. Ka pasur gjoba edhe për subjekte politike dhe mendoj që duhet të zgjerohet mbikëqyrja jo vetëm në qendra të caktuara inspektorati sanitar, Policia e Kosovës dhe të gjithë të tjerët duhet të jenë më proaktiv dhe të shohin kalendarin zgjedhjeve që partitë politike duhet të paraqesin qoftë në polici dhe përmes tyre ta mbikëqyrin mbarëvajtjen e procesit, por aktiviteteve”, ka shtuar Zemaj.