Sigal Prishtina është duke zhvilluar fazën përgatitore jashtë Kosovës, ku ka aranzhuar edhe disa ndeshje miqësore.
Një ndër do ishte edhe takimi ndaj Mornarit të Malit të Zi.
Kryeqytetasit në faqen e tyre zyrtare në ‘Facebook’ kishin raportuar kanë qenë në avantazh pas pjesës së parë ndaj Mornarit me rezultat 43:35, raporton Sporti në KTV.
Pas përfundimit të ndeshjes kampioni i shumëfishtë i Kosovës, kishte publikuar edhe rezultatin përfundimtar të ndeshjes 70:74, në favor të tyre.
Ky gëzim i prishtinasve nuk zgjati shumë pasi tifozët e klubit prishtinas, zbuluan: se Prishtina kishte pësuar humbje në këtë takim e jo si thuhej në faqen zyrtare.
Prishtina ka humbur ndeshjen e dytë miqësore ndaj Mornarit, me rezultat bindes 92:69.
Pas zbulimit të rezultatit përfundimtar faqja zyrtare e klubit fshiu postimet rreth kësaj ndeshje miqësore.
Nga ana tjetër faqja zyrtare e klubit nga Mornari, ka publikuar rezultatin përfundimtar të këtij takimi ku fitorja u takoi malazezëve me 92:69.
Përveç kësaj klubi i Mornarit, ka sqaruar se përkundër se ishte vetëm një ndeshje miqësore prishtinasit kishin tërhequr ekipin nga parketi për t’u rikthyer sërish.
Pas komenteve të shumta të tifozëve prishtinas të cilët kërkonin sqarim rreth rezultatit të postuar klubi ka arsyetuar postimin e rezultatit.
“Sonte e zhvillojmë ndeshjen e dytë kundër Mornar Bar në Tivar. I lusim dhe kërkojmë mirëkuptim nga disa komentues që të përmbahen nga komentet negative sa i përket rezultateve, meqë në ndeshjet testuese rezultati për ne është në plan të dytë. Janë thjesht stërvitje, vetëm se nuk mbahen në palestër në Prishtinë. Lojtarët që janë të ri në ekip, kanë nevojë të komponohen, ndërsa trajneri dhe stafi mbështetës duhet të testojnë strategji dhe aksione të ndryshme gjatë këtyre ndeshjeve. Shpejt vjen koha kur do të luftojmë bashkë me ju për rezultate” thuhet në arsyetimin e prishtinasve.
Prishtina ka paralajmëruar edhe pesë ndeshje të tjera miqësore në kuadër të përgatitjeve për Champions League.