Arbëri

Daka: Numërimin e votave e vonojnë keqpërdorimet nga komisionerët

Kryetarja e Komisionit Qendror të Zgjedhjeve, Valdete Daka, duke folur për zgjedhjet e parakohshme ka thënë se ia kanë dalë t’i menaxhojnë mirë ato.

Megjithatë nuk ka lënë pa përmendur as disa keqpërdorime.

Në “Interaktiv” të KTV-së, ajo ka thënë se KQZ-ja do të ishte e gatshme qysh brenda dy ditëve t’i shpall rezultatet përfundimtare të zgjedhjeve, por ajo që ndodh është faji i komisionarëve të partive politike.

“Disa komisionerë kanë bërë keqpërdorime në të dhënat e formularëve duke iu shtuar vota kandidatëve të caktuar brenda një partie. Të dhënat pastaj nuk përputhen, dhe automatikisht ajo kuti shkon në rinumërim dhe kjo në masë të madhe e zvarrit procesin”, ka thënë ajo.

Daka ka thënë se nuk përjashtohet mundësia edhe që komisionarët të bëjnë gabime.

“Janë edhe gabime njerëzore, e jo gjithmonë vetëm tendencë për manipulime”, ka thënë Daka.