Tensionet mes Kroacisë dhe Serbisë janë rritur në prag të zgjedhjeve të parakohshme parlamentare në Serbi, pasi policia serbe ka arrestuar disa persona të dyshuar për përgatitjen e trazirave, mes tyre edhe dy burra që, sipas mediave serbe, kanë pasaporta kroate.
Ministria e Punëve të Jashtme dhe Çështjeve Evropiane e Kroacisë ka reaguar duke thënë se nuk ka marrë njoftim zyrtar për arrestimet. Ajo i ka cilësuar akuzat ndaj Kroacisë si të pabazuara dhe me motive të brendshme politike.
Arrestimet u kryen në Novi Sad e Beograd, ndërsa të dyshuarit me inicialet Marko V. dhe Matej A. dyshohet se kanë planifikuar veprime të dhunshme gjatë ditës së zgjedhjeve, të caktuara për 25 tetor. Sipas mediave serbe, njëri dyshohet se ka organizuar një grup për të shkaktuar dhunë në Beograd, ndërsa tjetri për nxitje të ndryshimit të dhunshëm të rendit kushtetues. Mediat serbe pretendojnë se të dy kanë pasaporta kroate.
Këto pretendime ende nuk janë konfirmuar në mënyrë të pavarur dhe autoritetet serbe nuk kanë publikuar prova të mjaftueshme për të vërtetuar lidhjen e të dyshuarve me veprimet e pretenduara, shkruan “Index.hr”.
Rasti vjen vetëm një javë pasi Beogradi i dërgoi Kroacisë notë proteste, duke e akuzuar për ndërhyrje në punët e brendshme dhe në fushatën zgjedhore të Serbisë. Presidenti serb, Aleksandar Vuçiq, ka përsëritur akuzat për ndërhyrje të huaj, ndërsa kryeministri kroat, Andrej Plenkoviq, i ka cilësuar ato si të pabaza.
Në sfond janë zgjedhjet e 25 tetorit, të cilat zhvillohen në një klimë të tensionuar politike, me lëvizjen studentore si sfidë për pushtetin e Vuçiqit dhe Partinë Progresive Serbe. Në Serbi janë raportuar gjithashtu akuza për presion ndaj kundërshtarëve politikë dhe frikësim të votuesve.
Për shkak të situatës politike dhe të sigurisë, Ministria e Jashtme e Kroacisë ka këshilluar qytetarët e saj që të shtyjnë udhëtimet jo të domosdoshme drejt Serbisë dhe të tregojnë kujdes të shtuar nëse udhëtojnë atje.