-
Превела: Вита Абраши-Кајтази
- 28. октобар 2026. 15:10
- Учешће у:
Studimi i ri tregon se grimcat e vogla të plastikës mun d të nxisin procese kimike që dëmtojnë qelizat dhe mund të shkaktojnë inflamacion, ka shkruar Newser.
Mikroplastikat mund të jenë të dëmshme për organizmin jo vetëm për shkak të kimikateve që përmbajnë, por edhe për shkak të reaksioneve kimike që shkaktojnë vetë. Ky është përfundimi i një studimi të ri nga studiuesit e Universitetit Columbia, i publikuar në revistën shkencore Nature.
Studiuesit zbuluan se grimcat e vogla të plastikës, përfshirë ato nga polistireni, polietileni dhe PET-i, mund të prodhojnë specie reaktive të oksigjenit kur bien në kontakt me ujin dhe gjakun e minjve. Këto molekula mund të dëmtojnë ADN-në, proteinat dhe membranat e qelizave, duke nxitur dëmtimin e qelizave dhe inflamacionin.
Një nga faktorët kryesorë është madhësia e grimcave. Kur plastika copëtohet në pjesë gjithnjë e më të vogla, sipërfaqja e saj rritet dhe mundëson më shumë reaksione kimike.
“Proteinat dëmtohen. Qelizat dëmtohen”, ka shpjeguar Wei Min, një nga autorët e studimit, duke theksuar se ky proces mund të jetë i rëndësishëm për shëndetin, pasi trupi i njeriut përmban shumë ujë.
Shkencëtarët paralajmërojnë se mikroplastikat shpërbëhen shumë ngadalë dhe se efektet e ekspozimit afatgjatë meritojnë studime të mëtejshme.
Megjithatë, këto gjetje nuk provojnë se mikroplastikat shkaktojnë drejtpërdrejt kancerin apo sëmundjet e zemrës te njerëzit. Studimi ndihmon të shpjegohet një mekanizëm i mundshëm i dëmtimit qelizor, por nevojiten më shumë kërkime për të përcaktuar ndikimin real në shëndetin e njeriut.