Gjykata Themelore në Prishtinë ua ka caktuar nga një muaj paraburgim pesë të dyshuarve për rastin e 37 kilogramëve lëndë narkotike të llojit heroinë, në vlerë 550 mijë euro.
Të dyshuarit janë dy shtetas të Kosovës, dy shtetas turq dhe një i Maqedonisë së Veriut. Ata u arrestuan pas një aksioni të Policisë, Prokurorisë dhe Agjencisë së Kosovës për Inteligjencë.
Nga ky aksion u sekuestruan 37 kilogramë heroinë të ndara në 62 paketime me vlerë tregu mbi gjysmë milion euro.
“Pas mbajtjes së seancës dëgjimore, gjyqtari i procedurës paraprake ka aprovuar kërkesën e Prokurorisë Speciale të Republikës së Kosovës për caktimin e masës së paraburgimit ndaj pesë të pandehurve, duke caktuar masën e paraburgimit në kohëzgjatje prej tridhjetë (30) ditësh, për secilin”, thuhet në njoftimin e Gjykatës Themelore për caktimin e masës së paraburgimit.
Një ditë më parë, në një konferencë të përbashkët të Prokurorisë Speciale dhe Policisë së Kosovës u bë e ditur mes tjerash se pesë të dyshuarit për këtë rast dyshohet se heroinën e transportonin të kamufluar me mallra komerciale nga Irani për në Kosovë. Sipas hetimeve preliminare, destinacioni i drogës ka qenë për tregun jashtë Kosovës.