Gjiganti i kriptovalutave Binance ka njoftuar se ka arritur të ngrijë rreth gjysmën e mjeteve të vjedhura në një sulm masiv kibernetik, përmes të cilit hakerët kanë arritur të përvetësojnë asete digjitale në vlerë prej rreth 6 miliardë eurosh.
Kompania, e cila është platforma më e madhe në botë për shkëmbimin e kriptovalutave, bëri të ditur se deri më tani ka arritur të sigurojë rreth 3 miliardë dollarë nga shuma e vjedhur. Pjesa tjetër vazhdon të jetë nën kontrollin e hakerëve, identiteti i të cilëve ende nuk dihet.
Fillimisht, Binance dyshoi se sulmi kishte ndodhur pasi një kompjuter portativ i një inxhinieri të kompanisë ishte komprometuar, duke u mundësuar personave të paautorizuar të kryenin tërheqje të mjeteve. Megjithatë, më vonë kompania sqaroi se sulmi kishte përmasa më të gjera.
Disa kompani të specializuara në analizimin e transaksioneve të kriptovalutave e kanë lidhur sulmin me një grup hakerësh nga Koreja e Veriut. Nëse konfirmohet, kjo do të ishte vjedhja më e madhe e kriptovalutave të regjistruara ndonjëherë, duke tejkaluar edhe vjedhjen prej 1.5 miliardë dollarësh nga platforma Bybit në vitin 2025.
Shërbimi Sekret i Shteteve të Bashkuara ka bërë të ditur se po punon intensivisht për identifikimin, gjurmimin, ngrirjen dhe rikuperimin e mjeteve të vjedhura.
Agjencia amerikane, e cila është përgjegjëse edhe për hetimin e krimeve financiare, ka deklaruar se synon t'i identifikojë personat përgjegjës për sulmin kibernetik dhe t'i nxjerrë para drejtësisë. Edhe Binance ka konfirmuar se po bashkëpunon me Byronë Federale të Hetimeve (FBI).
Kompania u ka dërguar gjithashtu mesazh përdoruesve të saj, duke u thënë se paratë e tyre janë të sigurta dhe se do të mbulojë të gjitha humbjet.
Pas sulmit, Binance fillimisht kishte pezulluar të gjitha depozitat dhe tërheqjet, por në një njoftim të mëvonshëm bëri të ditur se depozitat vazhdojnë të funksionojnë normalisht.
