Në edicionin e gjashtë të samitit rajonal “Për luftimin e diskriminimit racor ndaj komuniteteve”, kryeministri i vendit, Albin Kurti tha se kontributi i komuniteteve në Kosovë është edhe pjesë e situatës dhe sukseseve të vendit, derisa potencoi se ky samit është dëshmi e përkushtimit për barazi e dinjitet njerëzor, raporton KosovaPress.
Kurti vlerësoi se përfshirja e komuniteteve në shoqëri është çështje e të drejtave të qytetarëve dhe jo çështje privilegji.
“Ky samit është dëshmi e përkushtimit të vazhdueshëm për barazi, drejtësi dhe dinjitet njerëzor, por edhe për angazhim të pandërprerë që vetëm sa shtohet, meqënëse barazia nuk arrihet njëherë e përgjithmonë. Ajo ndërtohet, mbrohet dhe avancohet çdo ditë...Përfshirja e komuniteteve është çështje e të drejtave të qytetarëve dhe e detyrave të institucioneve, jo e privilegjit apo e favorizimit”, tha Kurti.
Ambasadorja e Zvicrës në Kosovë, Anne-Lise Cattin Hennin tha se luftimi i diskriminimit racor ndaj komuniteteve është një temë e rëndësishme për Zvicrën dhe përgëzoi Qeverinë për organizimin e këtij samiti.
Ajo tha se ky samit ofron mundësi të mirë për të gjithë partnerët e Ballkanit për të avancuar përfshirjen e komuniteteve dhe shkëmbimin e përvojave.
“Tani në edicionin e tij të gjashtë, ky samit pasqyron një angazhim të fortë dhe të qëndrueshëm ndaj dialogut, bashkëpunimit rajonal dhe veprimit kolektiv. Ai ofron një mundësi të rëndësishme për partnerët e Ballkanit Perëndimor jo vetëm për të avancuar përfshirjen, por edhe për të shkëmbyer përvoja, për të adresuar sfidat e përbashkëta dhe për të forcuar përgjigjet rajonale. Diskriminimi dhe antiziganizmi vazhdojnë të kufizojnë mundësitë e barabarta dhe pjesëmarrjen e plotë në shoqëri për komunitetet romë, ashkali dhe egjiptianë. Trajtimi i këtyre sfidave nuk është vetëm çështje e të drejtave themelore; është gjithashtu thelbësor për ndërtimin e një shoqërie më kohezive, elastike dhe të begatë”, tha ajo.
Drejtori i Zyrës për Qeverisje të mirë në kuadër të Zyrës së Kryeministrisë, Habit Hajredini tha se ende është sfiduese zbatimi i politikave të mira për komunitetet në praktikë, e në theks më të veçantë në nivel lokal.
“Sfida mbetet zbatimi i këtyre politikave në praktikë, veçanërisht në nivel lokal. Duhet të forcojmë përgjegjësinë institucionale, koordinimin dhe mbështetjen buxhetore në mënyrë që të drejtat dhe mundësitë e barabarta t'i garantojmë për secilin qytetar. Në këtë drejtim, Zyra për Çështje të Mirë, në kuadër të Zyrës së Kryeministrit, do të vazhdojë të forcojë koordinimin ndërinstitucional në nivel qendror dhe lokal”, tha Hajredini.
Në këtë samit morën pjesë përfaqësues të institucioneve dhe shoqërisë civile./KP