Céline Dion është rikthyer në skenë pas gjashtë vitesh, duke nisur të shtunën mbrëma serinë prej 26 koncertesh në Plenitude Arena në Nanterre të Francës. Këngëtarja 58-vjeçare ishte detyruar të largohej nga skena fillimisht për shkak të pandemisë së COVID-19 dhe më pas, pas diagnostikimit me sindromën e personit të ngurtë, një çrregullim i rrallë neurologjik.
Dion e nisi koncertin me këngën “On Ne Change Pas”, por u pushtua nga emocionet vetëm pak sekonda pas fillimit dhe u detyrua të ndalonte. Ajo u pa duke fshirë lotët, para se të vendoste dorën në gjoks dhe të bashkonte duart. Më pas vazhdoi performancën dhe këndoi edhe “Destin”, përpara se t’u drejtohej fansave me një mesazh emocionues.
“Bëra një premtim që do të kthehesha dhe do të isha sërish në skenë. Ja ku jam, duke kënduar për ju dhe për veten time, duke kënduar për jetën!”, tha Dion, duke falënderuar fansat për mbështetjen dhe durimin. Fjalimi i saj shërbeu si hyrje për hitin e vitit 1996, “Because You Loved Me”.
Koncerti i fundit i plotë i Dion ishte mbajtur në mars të vitit 2020 në New Jersey, para se turneu i saj të anulohej për shkak të pandemisë. Në vitin 2022, ajo u diagnostikua me sindromën e personit të ngurtë, e cila mund të shkaktojë ngurtësi të muskujve, spazma, vështirësi në frymëmarrje dhe probleme me lëvizjen. Për t’u përgatitur për rikthimin, këngëtarja iu nënshtrua trajtimeve të reja, terapisë fizike dhe vokale, imunoterapisë, si dhe ushtrimeve të baletit dhe Pilates.
Dion, e cila së fundmi ka rrëfyer betejën e saj shëndetësore në dokumentarin “I Am: Céline Dion”, ka thënë se dëshironte t’u tregonte fansave se sa shumë i kishte munguar skena. “Ata blenë biletat dhe albumet e mia dhe më dhanë këtë luks. Prandaj, më e pakta që mund të bëj është t’u them se jam gjallë”, u shpreh ajo.