-
Von:
Valbona Bytyqi
- 2. November 2026 19:11
- Teilen mit:
Shqyrtimi i dy projektligjeve e i raportit të Auditimit për Buxhetin e vitit të shkuar, pritet të diskutohen të enjten, në seancën plenare të Kuvendit të Kosovës. Vendimi për të është marrë në mbledhjen e kryesisë, të mbajtur të hënën. Pas takimit, kryetarja e Kuvendit, Albulena Haxhiu, kishte një kërkesë për Prokurorinë.
Kryetarja e Kuvendit, Albulena Haxhiu, i ka bërë thirrje Prokurorisë Speciale, që të nisë hetimet ndaj zyrtarëve të përfshirë në rastin e vrasjes së Arlinda Zekajt.
Pas mbledhjes së kryesisë, Haxhiu ka thënë se rasti i Zekajt duhet të shërbejë që në të ardhmen të mos ketë zyrtarë që nuk e kryejnë punën e tyre.
“Është jashtëzakonisht e rëndësishme që Prokuroria pa vonesa të fillojë hetimet penale në raport me të gjithë zyrtarët, të cilët ose e kanë kryer punën në mënyrë të gabuar ose nuk e kanë vepruar fare në raport me përgjegjësitë që i kanë. Për shkak se rasti i Arlinda Zekajt dëshmon që t`i mundesh ligje, strategji, por në fakt janë zyrtarët në një institucion që varet pra, është në diskrecionin e tyre, nëse të njëjtat i zbatojnë apo jo”, tha Haxhiu.
Ajo theksoi se është e shqetësuar pse Këshilli Gjyqësor i Kosovës e Komuna e Pejës nuk kanë ndërmarrë ndonjë masë ndaj zyrtarëve të tyre, ashtu siç është vepruar me prokurorët dhe policët.
Kryetarja ka bërë të ditur se seanca e radhës e Kuvendit do të mbahet të enjten, nga ora 12:00.
Ndërkaq, shefi i deputetëve të Aleancës, Besnik Tahiri, ka njoftuar se javën tjetër, në Kuvend, do të diskutohet për energjinë.
“Sot për sot Kosova është duke blerë çmimin më të lartë të energjisë në nivel të Ballkanit Perëndimor. Sot për sot, blloku më i rëndësishëm i B1 është jashtë funksionit, për çka është folur sot. Ndërsa si rrjedhojë, sot Kosova në shumicën e qyteteve gjendet në terr. Diskutimi për energjinë realisht është diskutimi për jetën, trajtimi i kësaj teme me prioritet është forcim i pozicionit jo vetëm energjetik, por edhe strategjik... andaj e shohim si pikë jashtëzakonisht të rëndësishme”, tha Tahiri.
Në seancën e së enjtes, mes tjerash, pritet të shqyrtohen projektligji për regjistrimin e bujqësisë, ai për Inspektoratin Qendror të Bujqësisë, e raporti vjetor i Auditimit të Buxhetit të Kosovës për vitin 2025.