Cristiano Ronaldo nuk do të luajë më për Portugalinë. Ai e mbylli të enjten karrierën me përfaqësuesen portugeze si fitues i Evropianit dhe gjashtë paraqitjeve në Kupën e Botës. Largohet si golashënuesi më i mirë në nivel përfaqësuesesh.
Largimi i tij shënon fundin e karrierës impresive që nisi para më shumë se dy dekadash dhe përfundoi pas telasheve me përzgjedhësin Jorge Jesus, shkruan AP.
“Për popullin portugez, erdhi dita që ta dorëzojë numrin 7 në fanellën e përfaqësueses”, ka thënë 41-vjeçari në një video të gjatë të publikuar në rrjetet sociale. “Nuk e kam ndierë se ai më përkiste vetëm mua, por për 23 vjet, e kisha privilegjin dhe përgjegjësinë ta vishja, duke e mbrojtur dhe e mbajtur atë në stadiume në gjithë botën. Sot erdhi koha që ta dorëzojë tek e ardhmja. Nuk ishte vendim i lehtë sepse disa vendime nuk merren vetëm me mendje. Ato merren edhe me zemër. Rrugëtimit që nisi në gusht 2003 dhe e ndryshoi jetën time përgjithmonë, i erdhi fundi”.
Ronaldo do të vazhdojë të luajë në nivel klubesh, por pritet të mbyllet në fund të këtij sezoni me Al Nassrin në Arabinë Saudite.
Synimi i arritjes së 1,000 golave në karrierë është afër. Aktualisht ka shënuar 985 gola. 146 gola në 234 paraqitje i shënoi për Portugalinë.
Portugalia planifikon ta nderim për “më të mirin e gjitha kohëve”
Derisa rivali më i madh i tij, Lionel Messi, e mbylli karrierën me Argjentinën muajin e kaluar me ndeshje përshëndetëse e madhështore, paraqitja e Ronaldos me Portugalinë u mbyll me fitore 1:0 ndaj Uellsit më 24 shtator në Ligën e Kombeve.
Jesusi e mbajti atë në bankën rezervë për ndeshjen tjetër dhe nuk kishte në plan që ta fuste në lojë edhe në duelin tjetër më vonë. Kështu, Ronaldo vendosi të largohej nga kampi portugez. Jesusi më vonë tha se Ronaldo është i mirëpritur dhe vendimi për t’u kthyer varet nga ai.
Federata e Futbollit e Portugalisë nëpërmjet një komunikate shprehu “mirënjohje të thellë dhe admirim të jashtëzakonshëm” për shërbimin e Ronaldos ndaj shtetit të tij.
“Cristiano Ronaldo e ka ngritur profilin e Portugalisë dhe ka inspiruar gjeneratat e reja që ëndërrojnë karrierën e tij. Për shumë prej nesh, ai është lojtari më i mirë i të gjitha kohëve”, ka shkruar Federata portugeze.
Është thënë që do të organizohet përshëndetje madhështore për Ronaldon “në të cilën tifozët dhe shteti do të mundet edhe një herë tjetër ta duartrokas dhe festoj për lojtarin që na ka dhënë aq shumë”.
Ronaldo e ndihmoi Portugalinë drejt nivelit të ri
Para se Ronaldo të debutojë për Portugalinë duke e zëvendësuar Luis Figon në miqësore në vitin 2003 kundër Kazakistanit, Portugalia asnjëherë nuk kishte fituar trofe madhor.
Më pas ai dhe brezat pasues të bashkëlojtarëve të talentuar, e bënë Portugalinë pjesëmarrëse të rregullt në turne madhor.
Portugalia e fitoi trofeun e parë të madh në “Euro 2016”, dhe më pas në Ligën e Kombeve 2019 dhe 2025.
“Përgjatë gjithë karrierës time me përfaqësuesen, kam shkuar përtej limiteve të mia”, ka thënë Ronaldo. “Kam dashur të fitojë. Doja të ishim më të mirë. Doja të shkruaja histori. Kam kërkuar gjithmonë shumë nga vetja. Gjithmonë kam dashur më shumë. Kam besuar se mund të shkojmë larg. Dhe kam dhënë për këtë fanellë çdo gjë që kisha”.
Portugalia u kualifikua për Kupë të Botës vetëm tri herë para kohës së Ronaldos, në vitet 1966, 1986 dhe 2002. Me Ronaldon, Portugalia u kualifikua në secilën herë.
E njëjta është edhe për Kampionate Evropiane, në të cilat Portugalia luajti tri herë para Ronaldos, në vitet 1984, 1996 dhe 2000. Pasi ai arriti, Portugalia luajti në secilin turne. Portugalia ishte nënkampione në debutimin e Ronaldos në “Euro 2024”.
Në Kupën e Botës, Portugalia arriti vend të katërt me Ronaldon, në debutimin e tij në vitin 2006. Ishte në mesin e kandidateve për të triumfuar sa herë që mori pjesë. Por, rezultatin më të mirë e pati në çerekfinale të Botërorit 2022.
“Kishte pasdite dhe netë të përkryera. Kishte fitore të cilat nuk do t’i harrojë kurrë. Kishte humbje që ende dhembin”, ka thënë Ronaldo. “Kam bërë gabime. Kam vuajtur. Kishte edhe momente që nuk kam mundur t’i jap popullit portugez atë që ata jashtëzakonisht shumë e kanë dashur. Por unë nuk u dorëzova asnjëherë, nuk u ndala kurrë së ndieri krenar që përfaqësoj Portugalinë”.
Paraqitja më e suksesshme e Portugalisë në Kupën e Botës ishte vendi i tretë në vitin 1966 me të madhin Eusebio, që ishte paraqitja e vetme e portugezëve në Botëror, deri në vitin 1986.
Rekordet ndërkombëtare
Ronaldo ishte futbollisti i parë që shënoi në gjashtë Kupa të Botës. Ai në Botërorin e këtij viti u bë golashënuesi më i mirë portugez në ngjarjen globale me 11 gola, duke e thyer rekordin e Eusebios, që kishte nëntë gola.
Ronaldo ka shënuar për Portugalinë në 23 vite kalendarike rresht, prej vitit 2004 deri në vitin 2026.
U bë futbollisti i parë që arriti 200 paraqitje, dhe 234 paraqitjet e tij vazhdojnë të jenë numër rekord në nivel përfaqësuesesh te futbollistët.
Ronaldo po ashtu e mban rekordin për më së shumti ndeshje në Evropian, me 30 gjithsej, dhe me më së shumti gola të shënuar në ngjarjen kontinentale, me 14 në total.
Goli i parë me Portugalinë nga Ronaldo u shënua në fillim të “Euro 2004”, kur nikoqirja Portugalia u mposht në finale nga Greqia.
Videoja lamtumirëse e Ronaldos ishte lexim i njoftimit për pensionim, e ndërthurur me pamje të tij duke luajtur për përfaqësuesen portugeze, dhe me pamje të tifozëve portugezë.
“E kam kaluar gjithë jetën duke punuar për t’u bërë lojtari më i mirë në botë”, ka thënë Ronaldo në fund. “Sot e kuptoj se fitorja më e madhe ishte ta fitoja nderin duke e përfaqësuar shtetin më të mirë në botë. Faleminderit për këto 23 vjet. Faleminderit që më besuat. Faleminderit që më lejuat ta jetojë ëndrrën që nisi kur isha djalosh i vogël në Madeira, duke vrapuar pas topit të futbollit. Fanella me numrin 7 do të mbetet. Krenaria që e mbajta veshur do të jetë e imja përgjithmonë”.