Një zyrtar i lartë i Hamasit, i cili kishte ndihmuar në planifikimin dhe drejtimin e sulmit të 7 tetorit 2023 ndaj Izraelit, është vrarë në një sulm ajror izraelit, kanë njoftuar zyrtarë izraelitë dhe palestinezë.
Samir Abu Younis, komandanti i sapoemëruar i Brigadës së Rafahut, është vrarë të shtunën në Al-Mawasi, në jug të Rripit të Gazës, sipas krahut ushtarak të Hamasit, Brigadave Al-Qassam.
Një zyrtar lokal i Hamasit ka konfirmuar vdekjen e Younisit. Ushtria izraelite ka thënë se e kishte shënjestruar atë dhe se, para sulmit, “ishin ndërmarrë hapa për të minimizuar dëmtimin e civilëve”.
Dëshmitarët okularë në Gaza kanë thënë se katër raketa kishin goditur një tendë në kampin Al-Ëaha, ku strehohen qindra persona të zhvendosur në Al-Maëasi, duke shkaktuar zjarr.
Një burim mjekësor në spitalin Nasser, në qytetin jugor Khan Younis, ka thënë se atje kishin mbërritur tre persona të plagosur dhe një trup i pajetë.
Forcat e Mbrojtjes së Izraelit (IDF) dhe Agjencia Izraelite e Sigurisë (ISA) ka konfirmuar në një deklaratë në Telegram se kishin “eliminuar” Younisin.
Duke e cilësuar atë si “një figurë qendrore mes drejtuesve të lartë të Hamasit”, ushtria izraelite ka thënë se ai kishte vepruar me synimin për të rikthyer fuqinë e brigadës dhe të organizatës Hamas.
Sipas deklaratës, Younis kishte udhëzuar luftëtarët e brigadës të përgatitnin dhe kryenin sulme kundër civilëve izraelitë dhe trupave të ushtrisë izraelite.
Sulmi i udhëhequr nga Hamasi ndaj jugut të Izraelit më 7 tetor 2023, gjatë të cilit u vranë rreth 1.200 persona dhe 251 të tjerë u morën peng, shkaktoi luftën e fundit në Gazë.
Që atëherë, në territorin palestinez janë vrarë më shumë se 74.650 persona, sipas ministrisë së Shëndetësisë në Gaza.
Megjithëse tetorin e kaluar u arrit një marrëveshje për armëpushim, Izraeli ka vazhduar herë pas here sulmet, duke thënë se shënjestron militantët e mbetur të Hamasit. Autoritetet izraelite pretendojnë se marrëveshja e armëpushimit ua lejon ndërmarrjen e këtyre veprimeve.