Besimtarët e fesë myslimane në gjithë botën kanë shënuar ditën e parë të Fitër Bajramit, një prej ditëve më të gëzueshme në traditën islame, me të cilën përfundon muaji i Ramazanit.
Bajrami zgjat tri ditë dhe është njëra prej festave më të rëndësishme të fesë myslimane, përcjell KTV.
Në Egjipt kishte emocion të veçantë meqë përpos Bajramit, shteti ishte dëshmitar i lojës së parë të përfaqësueses kombëtare në Kupën e Botës pas 28 vjetësh.
E gjithë shpresa e vendit u përqendrua te Mohamed Salah, sulmuesi i Liverpoolit, derisa vendi u përball me Uruguain.
Shumë egjiptianë e falen namazin të veshur në fanella të kombëtares.
E në Indonezi, shtet me 260 milionë banorë dhe komunitetin më të madh të myslimanëve në botë, xhamitë ishin të mbushura me besimtarë.
Tradita e të veshurit me veshje tradicionale lokale dhe shumëngjyrëshe vazhdoi edhe këtë vit.
Palestinezët në Rripin e Gazës shënojnë ditën e parë të festës myslimane të Fitër Bajramit mes shkallës në rritje të varfërisë dhe përkeqësimit të kushteve ekonomike.
Që nga viti 2007, Rripi i Gazës vuan nga bllokada shkatërruese izraelite, që ka shkatërruar edhe ekonominë e saj dhe vazhdon të privojë rreth 2 milionë banorë nga mallrat bazë, përfshirë ushqimin, karburantin dhe ilaçet.
Në një mënyrë të pazakontë, mijëra familje palestineze këtë vit nuk do të jenë në gjendje të përgatisin ushqimet e Bajramit si rezultat i ekonomisë së keqe.
Rreth 1 milion palestinezë varen nga ndihma që marrin nga Agjencia e Ndihmës dhe Punës e Kombeve të Bashkuara për Refugjatët e Palestinës në Lindjen e Mesme dhe nga grupet e ndihmave ndërkombëtare dhe arabe, që veprojnë në Rripin e Gazës.
Ndërkaq, në Afganistan, festimet filluan në paqe pasi palët ndërluftuese në vendin e rrënuar nga konflikti kanë arritur armëpushim pas konfliktit 17-vjeçar.
Duke iu adresuar popullit, presidenti i Afganistanit, Mohammad Ashraf Ghani, tha se qeveria është e gatshme të ndërmarrë hapa të mëtejshëm drejt procesit të paqes pas mbarimit të armëpushimit tetëditësh të njëanshëm dhe të pakushtëzuar të shpallur javën e kaluar nga qeveria. Ai shprehu dëshirën që armëpushimi t'i japë fund gjakderdhjes.
E në Dhaka të Bangladeshit mijëra njerëz mbushën trenat e tragetet me shpresë që secili të arrijë në shtëpi për festën e Bajramit.
Tollovi të madhe kishte në secilin vagon e traget, derisa në vend Bajrami do të kremtohet të shtunën ose të dielën, varësisht nga hëna.
E festë kishte edhe mes refugjatëve në qendrat e paraburgimit në Tripoli. Kjo qendër në kryeqytet është një prej disa vendeve ku po mbahen refugjatët e zënë në det, të cilët tentonin të iknin në Itali apo diku tjetër në Evropë.
© KOHA. Të gjitha të drejtat janë të rezervuara.
