Shteti shpërfill nevojën për më shumë inspektorë të punës, pasojat fatale për punëtorët
Me udhëzim të Komisionit Evropian, Kuvendi i Kosovës, në vitin 2013, futi në fuqi Ligjin për Sigurinë dhe Shëndetin në Punë.
Por, në Raportet e Progresit të vitit 2015, 2016 dhe 2017, thuhet se ky ligj është joefektiv, raporton KTV.
Për këtë arsye, Komisioni Evropian ka kërkuar vazhdimisht nga institucionet rritjen e numrit të Inspektorëve të Punës të paktën nga 45 në 65.
Por, kjo nuk po ndodh, me arsyen se buxheti është i ulët.
Shoqëria civile kërkon që pos rritjes, të ketë më shumë dënime.
Kurse, sindikata akuzon inspektoratin për mosmenaxhim të situatës.
Nga 80 mijë biznese aktive sa janë të regjistruara, në vitin 2017, inspektorët kanë arritur t’i inspektojnë vetëm 8100, ndaj të cilave kanë shqiptuar 232 gjoba, ndërsa në pesë muajt e parë të këtij viti, janë kryer 3300 inspektime, duke i gjobitur 34 biznese.
Vetëm në pesë muajt e parë të këtij viti, 6 persona kanë vdekur në vendin e tyre të punës, ndërsa në vitin e kaluar, kanë ndodhur 50 aksidente, 14 prej tyre me fatalitet.
© KOHA. Të gjitha të drejtat janë të rezervuara.
