Qeveria e Kosovës ka paralajmëruar masa rigoroze nëse vërtetohen abuzimet me çmime. Kryeministri, Albin Kurti, duke fajësuar qeveritë e kaluara që nuk i kanë dhënë prioritet prodhimit vendor, ka thënë se Qeveria që drejton po bën përpjekje për t’u dalë në ndihmë qytetarëve. E nga AAK-ja kërkojnë të largohet akciza për derivate dhe subvencionimi i bujqve të bëhet me masa emergjente

Rritjen e çmimeve të produkteve bazike, kryeministri Albin Kurti ia ka faturuar qeverive të kaluara. Sipas tij, mostrajtimi me prioritet i prodhimeve vendore ka krijuar varësi nga importi. Edhe pse ka thënë se nuk mund të kontrollojnë rritjen e çmimeve që po ndodh shkaku i luftës në Ukrainë, ka paralajmëruar masa nëse vërtetojnë se ka abuzime nga ana e tregtarëve.

“Unë e di se qytetarët e kuptojnë fare mirë se çmimet nuk i vendos Qeveria dhe aq më pak unë. E di se ata e njohin shumë mirë përpjekjen e Qeverisë sonë për t’u dalë në ndihmë atyre. Sikur e di se kjo nuk do të thotë se ata nuk brengosen kur çmimet rriten. Atë nuk e kontrollojmë dot, por ajo që mundemi të bëjmë dhe të kontrollojmë është manipulimi e përfitimi në emër të krizës, andaj do të shtohen kontrollet dhe mbikëqyrja”, ka thënë Kurti.

Sipas tij, ngritja e çmimeve të produkteve elementare dhe naftës është kosto e lirisë dhe demokracisë. Agresioni rus në Ukrainë ka thënë se po dikton rritjen e çmimeve dhe se Qeveria nuk i vendos ato.

“Republika jonë ka treguar gatishmëri për pranimin e 5 mijë refugjatëve nga Ukraina dhe kemi ndarë 150 mijë euro për pranimin e gazetarëve nga Ukraina. Kujtojmë se Rusia është një prej eksportuesve ma të mëdha të gazit dhe të naftës në Evropë. Energjia që mundëson prodhimin dhe nafta për transport janë fillimi dhe fundi i zinxhirit. E di edhe kuptojmë shqetësimin e gjithsecilit prej jush për rritjen e çmimeve. Edhe pse kjo s’është shkaktuar nga ne, po na prek edhe ne. Kur para 12 ditëve iu bashkuam botës për sanksionet, një kosto e tillë ishte e pashmangshme. Por kjo është kostoja e mbrojtjes së lirisë dhe demokracisë”, ka thënë ai.

Pas mbledhjes së Qeverisë, ministrja e Industrisë, Ndërmarrësisë dhe Tregtisë, Rozeta Hajdari, ka thënë se nuk ka vend për panik për furnizim me grurë dhe karburante.

“Nuk e di pse vjen ky panik kur nuk ka rrezik për mbyllje të kufijve dhe stoqeve. Ndoshta për grurin që Ukraina është një prej shteteve eksportuese, por Kosova nuk ka eksportuar nga Ukraina, nuk lidhet direkt. Kemi shtete mike, si Kroacia, Italia, Bullgaria, Turqia nga ku atje marrim grurë. Jemi në kontakt me MPJD-në, ambasadat dhe ministrat përkatës, homologët tanë që bisedojmë. Edhe në qoftë se ata e ndalin eksportin për disa prej produkteve, marrëveshjet ndërministrore ministër-ministër e lejojnë Kosovën të rritë mundësinë e stoqeve dhe rezervave shtetërore në këtë rast”, ka thënë Hajdari.

Ajo ka treguar se nga sinjalizuesit është informuar për tregtarë që kanë marrëveshje të përbashkët për çmimet, gjë që siç ka thënë do të hetohet me Autoritetin e Konkurrencës.

Grupi Parlamentar i AAK-së ka kritikuar Qeverinë e Kosovës, pasi, sipas tyre, nuk është duke e marrë seriozisht situatën me rritjen e çmimeve. Shefi i këtij grupi, Besnik Tahiri, në konferencë të jashtëzakonshme për media, ka thënë se qytetarët po kanë vështirësi të sigurojnë ekzistencën e tyre.

“Qytetarët që kanë pasur të hyra mesatare janë bërë të varfër, ndërsa të varfrit janë duke e kërkuar ikjen nga Kosova. Artikujt ushqimor, duke filluar nga rryma, derivatet, mielli, buka, ilaçet dhe të gjithçka tjetër është rritur. Nëse sot dikush e ka pagën 400 euro, vlera me devalvimit që ka ndodhur është diku 250 euro për të blerë konsumin në shportën për qytetarë. Situata në Kosovë kurrë nuk ka qenë më e rëndë ekonomikisht”, ka thënë Tahiri.

Ka kritikuar Qeverinë për përgjigjen që po i jep situatës aktuale.

“Qeveria në vend se të merret me vendime për Ligjin e pagave, ata po i rrisin çmimet. Në vend se të lirojë çmimin e derivateve përmes akcizës, ata po e pasurojnë buxhetin e tyre. Qeveria nuk po merr asnjë masë nga paralajmërimet që po i merr nga shoqata që merren e përpunimin e grurit, kanë thënë që mielli mund të shkojë në 60 euro për 100 kg”, ka theksuar ai.

Si masë për përballje më këtë gjendje, AAK-ja ka kërkuar që përkohësisht të largohet akciza për derivate, subvencionimi i bujqve të bëhet me masa emergjente, rritje të pagës minimale e veprime sa i përket çmimit të energjisë. Gjithashtu Tahiri ka kërkuar që deri në mars të sillet në Kuvend Ligji për paga, ose Qeveria të marrë vendim që të mbështesë me nga 100 euro shtesë zyrtarët publikë për disa muaj.