Të befasishëm dhe shpërfillës ndaj situatës së sigurisë e ka kualifikuar ministrja e Drejtësisë, Albulena Haxhiu, vendimin e Prokurorisë Speciale për lirimin e të arrestuarve, të cilët dyshoheshin se po përgatisnin nxitje të konfliktit në Kosovë.
Sipas Haxhiut, mekanizmat e sigurisë kanë pasur informacione se njëri nga tre serbët e arrestuar është pjesë e inteligjencës serbe dhe se ka komunikime të shumta me Federatën ruse.
“Përkundër këtyre informacioneve prokuroria fatkeqësisht ka liruar në procedurë të rregullt personat e dyshuar, me duhet të them se ky vendim i prokurorisë është u çuditshëm, është i befasishëm edhe për ne si Qeveri por edhe për qytetarët e Republikës së Kosovës dhe këto veprime janë injorim i ndonjë rreziku të mundshëm ndaj cenimit të sovranitetit dhe integritetit territorial të Republikës së Kosovës. Fakti që personat në fjalë nuk janë mbajtura as 48 orë në stacion policorë, tregon mospërfilljen ndaj cenimeve të mundshme të sovranitetit dhe integritetit territorial”, tha Haxhiu.
Policia e Kosovës ka konfirmuar ndalimin e tre serbëve dhe dy shtetasve kosovarë nën dyshimin se të njëjtit kanë blerë emblema të UÇK-së me qëllim realizimin e një videoje kinse disa ushtarë me uniforma janë gati për ta marrë veriun e Kosovës.
Pa u mbushur 48 orë, prokuroria i liroi me arsyen se nuk ka prova për ta proceduar rastin në gjykatë.
Kohën kur kërcënimi rus përshkallëzoi me luftë në Ukrainë, Haxhiu ka kërkuar nga institucionet e vendit që të jenë më bashkëpunuese në shmangien e rreziqeve.
“Pra vetëm kështu duke bashkëpunuar i mbrojmë qytetarët e Kosovës por edhe vet republikës së Kosovës këto reformat e fundit dëshmojnë reformat që kemi nisur si ministri e drejtësisë janë të domosdoshme janë të nevojshme , janë më ët nevojshme se kurrë dhe për të cilat do të punojmë pa ndalë”, tha ajo.
Kurse zëvendëskryeministri Besnik Bislimi shprehu shqetësimin për pushtimin rus dhe rëndësinë e krijimit të një fronti të përbashkët.
“Në të njëjtë kohë ne përcjellim me brengë faktin që jo të gjithë në Evropë dhe pa ekuivokë i janë bashkangjitur vlerave perëndimore në dënim të agresionit rus. Kjo vlen si për Bjellorusin ashtu dhe për fqinjin tonë Serbinë, e sidomos është shqetësues qëndrimi i Serbisë shtet ky me potencial të vazhdueshëm destabilizues në rajonin e Ballkanit perëndimor”, deklaroi Bislimi.
E, pas mbledhjes së Kryesisë të hënën shefja e deputetëve të Vetëvendosjes, Mimoza Kusari-Lila, propozoi miratimin e një rezolute për Ukrainën nëpërmjet së cilës bëhet qartë dallimi mes shteteve që u rreshtuan pro NATO-s e BE-së, dhe atyre që refuzuan ta bëjnë këtë, si rasti i Serbisë.
Por shefi i Grupit Parlamentar të AAK-së, Besnik Tahiri, kërkoi edhe debat parlamentar për gjendjen e sigurisë në vend.
“Ajo çka shihet në luftën në Ukrainë, sulmin e Rusisë të drejtpërdrejtë mbi tërësinë territoriale në një shtet demokratik dhe rreshtimin e Kosovës përkrah botës perëndimore është një moment që duhet të reflektohet. Ajo që dua të them është se rrethanat, të cilat janë krijuar në aspektin e sigurisë, si në nivel ndërkombëtar, po ashtu në nivel të Ballkanit Perëndimor, po ashtu kërkojnë një reflektim edhe të Kuvendit të Kosovës”, tha Tahiri.
Kosova iu bashkua Bashkimit Evropian dhe Shteteve të Bashkuara në vendosjen e sanksioneve Rusisë, pasi kjo e fundit nisi në shkallë të gjerë sulmin ndaj Ukrainës.
© KOHA. Të gjitha të drejtat janë të rezervuara.
