Në Bashkimin Evropian presin që takimi i së martës midis kryenegociatorit të Kosovës, Besnik Bislimi dhe homologut të tij serb, Petar Petkoviq, në kuadër të dialogut në Bruksel, të shërbejë për përgatitjen e një takimi të ri midis kryeministrit të Kosovës, Albin Kurti dhe presidentit të Serbisë, Aleksandar Vuçiq

Takimi i radhës midis kryenegociatorit të Kosovës, Besnik Bislimi, dhe homologut të tij serb, Petar Petkoviq, do të mbahet të martën në Bruksel.

Në Bashkimin Evropian presin që ky takim të shërbejë për përgatitjen e një takimi të ri midis kryeministrit të Kosovës, Albin Kurti dhe presidentit të Serbisë, Aleksandar Vuçiq.

Pas tre muajsh ngërç, në takimin e së martës në kuadër të dialogut Kosovë-Serbi, i pari për këtë vit, pritet që të diskutohet për të pagjeturit dhe për arritjen e marrëveshjes së përhershme për targat. Megjithëkëtë, ujdia për këto çështje po shihet si vështirë e arritshme në momentumin aktual ndërkombëtar dhe në prag të zgjedhjeve në Serbi.

Njohësi i procesit të dialogut, Arbër Fetahu, nga Grupi për Studime Juridike dhe Politike ka thënë për KosovaPress se rikthimi në tavolinën e bisedimeve të kryenegociatorëve është aspekt pozitiv për avancimin e dialogut.

“Në parim mund të konsiderohet si lajm i mirë rikthimi i kryenegociatorëve në tavolinën e bisedimeve, pasi ishte kërkesë e Bashkimit Evropian dhe Shteteve të Bashkuara të Amerikës, por edhe të deleguarve veç e veç të Britanisë dhe Gjermanisë. Prandaj, si nismë është e mirë e të dy qeverive që ulen për të diskutuar. Në anën tjetër, pritjet në perspektivën tonë janë të vogla duke marrë parasysh edhe momentumin që gjendemi, pasi Serbia është pranë zgjedhjeve parlamentare dhe ndonjë vendim i madh nuk është shumë i pritshëm që të merret në këtë periudhë ku fushata elektorale është në prag të vlimit dhe Kosova gjithmonë është një temë e nxehtë atje”, ka thënë ai.

Ndërkaq, gjatë takimit të së hënës të ministrave të jashtëm të BE-së, përfaqësuesi i lartë i bllokut evropian për Politikë të Jashtme dhe Siguri, Josep Borrell, ka tërhequr vërejtjen mbi mundësinë e shpërbërjes së Bosnjë-Hercegovinës. Ai u ka kërkuar ministrave e shteteve anëtare të BE-së që të marrin vendime për të ndalur krizën e thellë politike në këtë shtet.

Në kohën e etheve rreth një agresioni të Rusisë ndaj Ukrainës, i cili u quajt si “kërcënimi më i madh për luftë në Evropën e pas Luftës së Dytë Botërore”, Ministrat e jashtëm diskutuan të hënën edhe për situatën në Bosnjë-Hercegovinë. Kjo dëshmon se sa e shqetësuar është BE-ja edhe për stabilitetin në rajonin e Ballkanit Perëndimor, në kohën kur Evropa është në prag të luftës shkaku i situatës në lindje.

Ka pasur ministra të cilët kanë thënë se duhet parandaluar mundësia që tensionet nga lindja të bartën edhe në Ballkanin Perëndimor” dhe se “Ballkani mund të shndërrohet në poligon të ndikimit të forcave tjera”.

Zyrtarët e BE-së e kanë quajtur situatën në Bosnjë-Hercegovinë si “kriza më e madhe politike në këtë vend që nga përfundimi i luftës në vitin 1995”.

Borrell ka përmbledhur shqetësimin e ministrave të vendeve anëtare, duke thënë se duhet që të merren hapa për të ndalur dinamikën negative dhe të rrezikshme.

“Mos e mohoni rëndësinë e asaj që po ndodh në Bosnjë-Hercegovinë. Retorikat nacionaliste dhe separatiste janë duke u rritur në Bosnjë-Hercegovinë dhe po e rrezikojnë stabilitetin e madje edhe integritetin e vendit. Ministrat e BE-së do të duhet të marrin vendim se si të ndalin këtë dinamikë në Bosnjë dhe të evitojnë që shteti të shpërbëhet në disa copa. Kjo është një situatë kritike dhe ministrat do të duhet të miratojnë disa vendime për këtë”, ka thënë Borrelli.

Ministrat e BE-së kanë diskutuar edhe për mundësinë e sanksioneve ndaj liderëve politikë në këtë shtet ballkanik, të cilët shihen si përgjegjës për rrezikimin e unitetit, sovranitetit dhe integritetit territorial të vendit. Sanksionet do të përfshinin ndalimin e udhëtimit dhe ngrirjen e pasurisë dhe mjeteve financiare. Të tilla sanksione Shtetet e Bashkuara të Amerikës i kanë vendosur liderit serb të presidencës tripalëshe të vendit, Milorad Dodik. Nga BE-ja kanë thënë se sanksionet janë një mundësi, porse vetëm pasi që të shteren të gjitha opsionet e tjera.

Përfaqësuesi i lartë i BE-së ka theksuar gjithashtu se nuk ka vend në Evropë për një Bosnjë-Hercegovinë të ndarë.

BE-ja gjithashtu u ka bërë thirrje liderëve politikë në këtë shtet që të vazhdojnë përpjekjet për reformat e sistemit zgjedhor dhe për ndryshimet e kufizuara kushtetuese. Në këtë mënyrë, shteti do të mund të ecte përpara edhe në procesin e integrimeve evropiane.

Blloku evropian po punon në përpjekjet për të gjetur zgjidhje për krizën politike në Bosnjë, në bashkëpunim me SHBA-në. Të dërguarit e posaçëm të BE-së dhe SHBA-së për Ballkanin Perëndimor do të vazhdojnë përpjekjet e tyre me anë të takimeve me përfaqësuesit e partive politike në Bosnjë-Hercegovinë me qëllim të gjetjes së një zgjidhjeje.