Në sheshet e Prishtinës është kthyer marshi i efektivëve të Forcës së Sigurisë dhe të policisë.
Pas dy vjetësh, manifestimi qendror për shënimin e Përvjetorit të Pavarësisë i ka takuar këtij parakalimi.
E, kjo nxiti kureshtjen e qytetarëve.
Nuk munguan as krerët e shtetit, të cilët përkundër që ishin afër, kishin zgjedhur që rrugën nga Kuvendi ta bënin me vetura.
Fjalimet u rezervuan vetëm për ta.
“Rreth 13 mijë civilë të vrarë, prej të cilëve akoma shumë të zhdukur, rreth 20 mijë gra të dhunuara gjatë luftës që akoma kërkojmë drejtësi, e shumë e shumë dëme, shkatërrime tjera që kishin synim shfarosjen tonë tregojnë se drejtësia akoma nuk është vendosur e për drejtësi thërrasim çdo ditë”, ka thënë Vjosa Osmani, presidente e Kosovës.
“Mbi të gjitha, sot i kujtojmë heronjtë tanë që dhanë më të shtrenjtën dhe të çmuarën, jetën e tyre, për atë që është më e shtrenjta dhe më e çmuara e popullit tonë, liria e tij. Sot kujtojmë vuajtjen, flijimin e heronjve tonë, atyre që na e kujtojnë sa e shenjtë është liria dhe sa bukur që është të jetosh i lirë”, shtoi kryeministri Albin Kurti.
Mëngjesin e së enjtes, krerët e shtetit bënë homazhe edhe në kompleksin memorial “Adem Jashari” në Prekaz. Por, ata u deshtë të prisnin disa minuta, derisa përfaqësuesit e Komunës së Skenderajt bënë homazhe, ani se në kompleks mbërritën përnjëherësh.
Aty nuk mungoj as familjari i Jasharëve, derisa qytetarët që e vizituan këtë vend thanë se kjo familje meriton më shumë respekt.
“E që kemi shumë obligime dhe punë për të ndërtuar e forcuar Kosovën tonë të dashur ashtu siç është edhe amaneti i dëshmorëve”,u shpreh Bekim Jashari, familjar i Jasharëve.
Homazhe nga krerë institucionalë e të partive politike gjatë ditës janë bërë edhe te varri i ish-presidentit, Ibrahim Rugova.
© KOHA. Të gjitha të drejtat janë të rezervuara.
