Me arsyetimin se Kosova tashmë ka tejkaluar pikun e përhapjes së variantit Omicron të koronavirusit, Qeveria e Kosovës ka vendosur që t’i lehtësojë masat kundër përhapjes së COVID-19. Në një konferencë për media, kryeministri i Kosovës, Albin Kurti, dhe ministri i Shëndetësisë, Rifat Laifi, kanë prezantuar masat, duke thënë se janë propozime të ekspertëve shëndetësorë

Nga e shtuna qytetarët e Kosovës nuk do të kenë më nevojë që të bartin maska mbrojtëse nga COVID-19 në ambiente të hapura. Qeveria e Kosovës, këtë dhe të tjera masa lehtësuese të propozuara nga Komiteti për menaxhimin e pandemisë, i ka miratuar të premten. Megjithatë, përdorimi i maskës mbrojtëse mbetet obligues edhe më tutje në ambientet e mbyllura.

Masat e reja u prezantuan gjatë një paraqitjeje për media të kryeministrit të Kosovës dhe ministrit të Shëndetësisë, të cilët i arsyetuan lehtësimet. Kreu i ekzekutivit, Albin Kurti, tha se masat kanë pasur efekt edhe në imunizimin e qytetarëve, ku gjatë dy javëve të fundit janë administruar mbi 40 mijë doza të vaksinës.

“Kosova po arrin të kalojë valën e variantit Omicron, dukshëm më lehtë se disa vende të tjera të rajonit e të botës. Trendi i rasteve të reja po bie për të gjashtën ditë me radhë, aktualisht është 31 për qind më i ulët sesa piku. Spitalizimet janë në nivelin 16.6 për qind të pikut të valës së variantit Delta dhe janë gati pesë herë më të ulëta sesa në të njëjtën fazë të asaj vale”, ka thënë ai.

E ministri i Shëndetësisë, Rifat Latifi, theksoi se kanë vendosur disa lehtësime, pa harruar ruajtjen e shëndetit, teksa ka përmendur disa nga masat që janë lehtësuar. “Hyrja në Kosovë u lejohet personave që posedojnë certifikatën e vaksinimit me dy vaksina apo me një nëse është nga “Johnson&Johnson”, vetëm me një dozë nëse ka edhe test PCR, ose personit që ka e ka kryer virusin në tre muajt e fundit ose është testuar negativisht në 48 orët e fundit. Hiqet obligimi i bartjes së maskës në hapësirat e hapura, ndërsa mbetet në të gjitha rastet në hapësirat e mbyllura. Kufizimi i qarkullimit është nga ora 00:00-05:00. Ndërsa gastronomia do të punojë deri në orën 23:00”, ka bërë të ditur ai.

Megjithëkëtë, Latifi ka thënë se po qe se do të ketë rritje të rasteve dhe të të hospitalizuarve, ashpërsimi i masave mund të bëhet sërish.

Masa më të ashpra kundër përhapjes së COVID-19 u vendosën më 21 janar, pas rritjes së shpejtë të rasteve me Omicron, e që ngjallën reagime të shumta, të shteteve fqinje e të qytetarëve, të cilët edhe protestuan, duke kërkuar rishikim të tyre.

Latifi ka specifikuar se masat nuk janë zbutur për shkak të presionit.

“Kjo qeveri dhe kjo ministri nuk merr vendime në bazë të presionit, por për të mirën e qytetarëve”, u shpreh Latifi.

Me masat e reja është lejuar puna e fitneseve, derisa të ndaluara mbesin veprimtaritë në klubet e natës dhe në ahengjet familjare.

Të gjitha këto masa janë diskutuar një ditë më parë, edhe në Komitetin për menaxhimin e pandemisë.

Megjithëse tash e një kohë veprimtaria e gastronomëve lejohet vetëm për personat që janë të vaksinuar, kjo gjë nuk po respektohet. Vetëm gjatë muajit janar mbi 100 biznese janë mbyllur e mbi 300 janë gjobitur për shkak se kanë shkelur masat kundër COVID-19. Sipas Lamir Thaçit, nga AUV-i, në mesin e shkelësve janë edhe ata që kanë lejuar edhe persona të pavaksinuar.

“Në qoftë se në pikat e vendimit kanë qenë kriter që lokalet të shërbejnë vetëm për persona të vaksinuar, inspektori gjatë inspektimit ka verifikuar nëse është duke u respektuar edhe kjo pikë e vendimit të Qeverisë, dhe në disa raste janë shqiptuar gjoba edhe për këtë pikë të vendimit që nuk kanë kërkuar vaksinat apo certifikatat e vaksinimit për konsumatorët e tyre”, është shprehur ai.

Gjatë 24 orëve të fundit, një person ka vdekur dhe janë konfirmuar 1 mijë e 853 raste të reja pozitive me COVID-19 në Kosovë. Deri tash numri i rasteve aktive është 31.084.

E po në këtë periudhë janë vaksinuar 2.416 persona. Me dozë të dytë deri tani janë vaksinuar 807.383 persona, ndërkaq me dozë të tretë dhe përforcuese janë vaksinuar 86.437 persona. Numri i dozave të vaksinave të administruara deri më tani në Kosovë është 1.789.127.