Ish-drejtori i përgjithshëm i Policisë së Kosovës, Rashit Qalaj, tani deputet i PDK-së, në cilësinë e dëshmitarit ka dëshmuar para Dhomave të Specializuara në Hagë në gjykimin ndaj drejtuesve të OVL-UÇK-së, Hysni Gucati dhe Nasim Haradinaj. Në dëshminë e tij, Qalaj ka thënë se ata janë kontaktuar nga zyrtarët e OVL-UÇK-së, të cilët u kishin kërkuar që të hetojnë rastin lidhur me dokumentet që po u dërgoheshin në zyrë. Por, zhvillimin e hetimeve nga ana e tyre, sipas Qalajt, nuk e ka lejuar Prokuroria Speciale e Kosovës.
“Policia e Kosovës nuk mund të hetojë këtë rast për shkak se ky rast bie në kompetencat e zyrave të specializuara këtu në Hagë”, ka theksuar deputeti i PDK-së.
Qalaj ka thënë se para shpalljes së pavarësisë, ka pasur raste kur hetimet i kanë bërë vetëm ndërkombëtarët, porse pas kësaj, sipas tij, kjo është hera e parë që Policia e Kosovës nuk ka pasur asnjë lloj komunikimi me përfaqësues të drejtësisë ndërkombëtare.
“Që nga shpallja e pavarësisë e tutje në të gjitha rastet apo në shumicën e rasteve ka qenë Policia e Kosovës ajo që është marrë me shumicën e rasteve së bashku me kolegët tanë ndërkombëtarë. Dhe kjo është hera e parë që Policia e Kosovës nuk ka pasur as edhe një komunikim të vetëm me Dhomat e Specializuara që janë këtu në Hagë”, është shprehur ish-drejtori i Policisë së Kosovës.
Gjatë dëshmisë së tij në Hagë, Qalaj ka thënë se nënkryetarin e OVL-UÇK-së, Nasim Haradinaj, nuk e njeh personalisht, por vetëm nga fakti që i njëjti është person publik në Kosovë.
Para se të dëshmonte Qalaj, dëshminë e tij para trupit gjykues të Gjykatës Speciale e ka përfunduar Nasim Haradinaj. Ai duke iu përgjigjur pyetjeve të avokatit të tij, ka thënë se kundërshtimin e kanë ndaj qasjes së Zyrës së Prokurorit të Specializuar e jo ndaj Gjykatës. Ai ka theksuar se Gjykatën e sheh si legjitime. Por, ka ripërsëritur se është kundër qasjes selektive që sipas tij e ka gjykata ndaj kryesve të krimeve.
“Mendoj që çdonjëri që ka kryer krim është meritor dhe e meriton dhe duhet të sillet para drejtësisë, pse të seleksionohen këta”, është shprehur Haradinaj.
Derisa pas kundërshtimit të prokurorit, Haradinajt nuk i është lejuar që të flasë për të përfshirët në masakrat kundër shqiptarëve që kanë ndodhur gjatë luftës në Kosovë. Haradinaj ka deklaruar se të gjitha veprimet lidhur me dokumentet e Speciales, Haradinaj ka thënë se i ka bërë për hir të interesit publik, porse asnjëherë nuk ka publikuar apo fotografuar dokumentet.
Haradinaj dhe kryetari i OVL-UÇK-së, Hysni Gucati, po akuzohen nga Specialja për shpërndaje të informacioneve sekrete lidhur hetimet e Task Forcës Hetimore Speciale. Gjykimi ndaj tyre do të vazhdojë më 21 janar.
© KOHA. Të gjitha të drejtat janë të rezervuara.
