Pyetjet nga Zyra e Prokurorit të Specializuar rreth krimeve të kryera gjatë luftës në Kosovë nga aparati shtetëror serb e përmendja e ish-kriminelit Slobodan Milosheviq kanë bërë që ish-nënkryetari i OVL të UÇK-së të mos i përmbajë lotët.
Në dëshminë e tij para Dhomave të Specializuara, Nasim Haradinaj ka thënë se do të kundërshtojë gjithmonë njerëzit që bazohen në të dhënat e Milosheviqit.
Ai ka thënë se kundërshton çdo gjykatë selektive duke kërkuar nga trupi gjykues që të gjykojë të gjitha krimet e ndodhura në Kosovë.
“Në momentin që e shtini zbulimin e të gjitha krimeve, ndryshoni qasje, prandaj janë këto që njerëzit nuk ju duan, kështu po reflektoni ndoshta është e gabueshme, kështu po reflektoni dhe është mirë dikush të thotë si po reflektoni, është ndihmë, duhet me qenë falënderues, me sjelljet e juaja kështu po reflektoni. Njeriu që ka dënuar me vdekje njerëz, Vukçeviq nëse guxohet me fol, gjatë luftës, njeriu i parë i Millosheviqit, dhe t’i referoheni këtyre, çka mendon që ata mendojnë për shqiptarët, patologjikisht ata e kanë krijuar sindromën me i urrejtë shqiptarët. 100 vjet na kanë vrarë, pre, grirë”, “Edhe të Zotit që bazohet në të dhënat e Millosheviqit, unë jam kundërshtar. Varri më qet prej dheut po të mos e kundërshtoj Millosheviqin”, tha Haradinaj.
Ka kritikuar ZPS-në për kapje të drejtësisë.
Haradinaj tha se ZPS-ja po e provokon, kur u pyet nëse UÇK-ja ka kryer krime. Ai tha se ka kundërshtarë e do të ketë gjithmonë nëse prokurori është kundër UÇK-së.
“Z. prokuror nuk jam ai që dua t’u ndihmoj si prokuror apo ZPS. Po ua them për dy herë, me rastin e Millosheviqit dhe tash me këtë pyetje, po do me bë qëllim si precedentë të katër dhe nëse kjo në Kosovë nënkuptohet si unë mendoj që mund të nënkuptohet, ju po doni të më bëni precedent të paqenë. Pse po mendon ashtu, kush ka menduar ashtu. Ju nuk keni thënë se po e ndiqni UÇK-në, tash po thoni që jeni duke e ndjekur UÇK. Jeni duke e ndjekur krimin, apo vetëm UÇK-në po e ndiqni”, tha ai.
Haradinaj ka thënë se deputetët që e votuan themelimin e Gjykatës Speciale e kanë fajin që Zyra e Prokurorit të Specializuar e ka uzurpuar drejtësinë në Kosovë.
© KOHA. Të gjitha të drejtat janë të rezervuara.
