Edhe një padi kundër Ministrisë së Mjedisit, Planifikimit Hapësinor dhe Infrastrukturës është dorëzuar pranë Gjykatës Themelore të Prishtinës.
Grupi për Studime Politike dhe Organizata “Gjethi” kanë paditur Ministrinë për dhënien e lejeve për ndërtimin e hidrocentraleve në Kaçanik.
“Procesi që i ka paraprirë lëshimit të lejeve ujore dhe mjedisore për hidrocentralin “Lepenci 3” ka pasur shkelje ligjore si në vijim: moszbatimi i procedurës së koncesionit, mungesa e debatit publik apo mungesës së njoftimit adekuat të publikut për të, degradimi i natyrës e cila rrethon lumenjtë dhe përtej saj, si dhe mohimi i të drejtës së banorëve të Kaçanikut për ujë të pijshëm dhe të ujitjes”, ka thënë Donika Qeta nga GLPS.
Sipas GLPS-së, kjo padi vjen në vazhdën e shumë të tjerave që për synim kanë të mbajnë përgjegjëse Ministrinë e Mjedisit për veprimet karshi dhënies së lejeve për hidrocentralet.
Derisa, nga organizata “Gjethi” thonë që të pesë hidrocentralet e ndërtuara dhe që parashihet të ndërtohen në Kaçanik kanë dëmtuar ambientin në masë të madhe.
“Në Komunën e Kaçanikut janë pesë sosh të ndërtuar ose që planifikojnë të ndërtohen dhe në të gjitha rastet ka qenë çështja e njëjtë, procedura e koncesionit që nuk është aplikuar dhe shkelje të tjera dhe posaçërisht ato të mjedisit”, ka thënë Sami Stagova nga “Gjethi”.
Hidrocentrali “Lepenci 3” është një nga dy hidrocentralet e ndërtuara nga kompania "Hidroenergji" Sh.p.k. në Komunën e Kaçanikut, si dhe një nga disa hidrocentralet që planifikohen të ndërtohen në këtë komunë.
© KOHA. Të gjitha të drejtat janë të rezervuara.
