Pas pesë ditësh reduktime të energjisë elektrike, të hënën me kërkesë të KOSTT-it, KEDS-i ka ndërprerë reduktimet të paktën deri në mesnatë.
Ndërprerja e reduktimeve është bërë pas shtimit të likuiditetit dhe blerjes së energjisë së importit, por edhe shtimit të 70 megavatëve nga energjia me erë.
Aktualisht në Kosovë prodhohen rreth 750 megavat për orë, por që kërkesat për konsum janë rreth 1.3 gigavat.
Të frustruar me reduktimet e ditëve të fundit më shumë se 2 orë, një grup simbolik i qytetarëve ka protestuar para ndërtesës së KEDS-it dhe të Qeverisë.
Në shenjë proteste ata kanë hedhur poçe elektrike në oborrin e ndërtesës së KEDS-it, nga i cili kanë kërkuar furnizim me rrymë 24 orë pa ndërprerë.
“Zëdhënësi i kësaj kompanie i ka deklaruar 140 milionë euro fitime për tetë vite, ndërkaq kur KEDS iu kanë bërë tetë vjet duke e shpërndarë rrymën, e duke e blerë prej një prodhuesi publik siç është KEK-u, ata kanë nis me na e reduktu rrymën, kjo nuk duhet me u pranua kurrsesi”, ka thënë Dibran Hoxha, organizator i protestës.
Pas protestës te KEDS-i ata kanë marshuar drejt ndërtesës së Qeverisë së Kosovë. Nga aty u kërkua shkarkimi i ministres Artane Rizvanolli.
“Kërkesat kryesore të kësaj proteste janë: 24 orë, shtatë ditë në javë rrymë për secilin prej nesh, pa dallime. Kërkesa tjetër është shkarkimi i ministres së Ekonomisë, Rizvanolli për shkak se kjo qasje e saj është ofenduese për secilin dhe secilën prej nesh. Edhe kërkesa e tretë e fondamentale është që KEDS-i të na kthehet në pronësi neve”, ka thënë Liridona Sijarina, organizatore e protestës.
Qytetarët i kanë shprehur pakënaqësi edhe me deklaratat e udhëheqësve.
Organizatorët paralajmëruan edhe protesta të tjera deri në përmbushjen e kërkesave të tyre.
Për ankesat e qytetarëve se reduktimet kanë zgjatur më shumë se 2 orë, Ministria e Ekonomisë ka thënë se po përgatit një dosje për ta dërguar në polici.
Ndërkaq, kryeministri i Kosovës, Albin Kurti, është arsyetuar duke thënë se nëse nuk do të reduktohet rryma, do të duhet të shtrenjtohet. Por, tha se situata me energji ka filluar të stabilizohet.
E zëdhënësi i KEDS-it, Viktor Buzhala, tregon faktorët që kanë ndikuar në përmirësim të sistemit.
“Ka filluar importi është rritur rreth 200 megavat janë duke u importuar. Lajmi i mirë është se prodhuesit e energjisë alternative janë duke i ndihmuar sistemit, janë duke u prodhuar një pjesë e konsiderueshme. Janë duke diku mbi 100 megavat, do të thotë se kjo e bënë që prodhimi të shkojnë në 750 megavat dhe si rrjedhojë të mbulohet pjesa më e madhe e konsumit. Ka ndikuar edhe ngrohja e temperaturave”, ka thënë ai.
Për ditët në vazhdim Buzhala ka thënë se presin instruksione nga KOSTT-i nëse do të ketë reduktime.
KOSTT-i kishte kërkuar reduktimet, shkaku i devijimeve në rrjet pas rritjes së konsumit, mungesës së prodhimit dhe pamundësisë së importimit të energjisë.
© KOHA. Të gjitha të drejtat janë të rezervuara.
