“Është diskutuar mundësia e një takimi të mundshëm në javën e dytë të dhjetorit në Bruksel me presidentin e Serbisë. Nuk kam kurrfarë informacioni që ka kushtëzime nga ndokush, veçse vlerësimi se a duhet të mbahet një takim i tillë ose jo i përket ndërmjetësuesit, lehtësuesit siç e quajnë ata veten”, ka thënë kryeministri Kurti

Prishtinë, 5 dhjetor – Java e dytë e dhjetorit pritet t’i bëjë bashkë kryeministrin e Kosovës, Albin Kurti, dhe presidentin e Serbisë, Aleksandër Vuçiq, në kuadër të diskutimeve të nivelit të lartë në procesin e dialogut.

Kreu i ekzekutivit kosovar njoftoi se po pret nga ndërmjetësuesit konfirmimin për takim.

“Është diskutuar mundësia e një takimi të mundshëm në javën e dytë të dhjetorit në Bruksel me presidentin e Serbisë. Nuk kam kurrfarë informacioni që ka kushtëzime nga ndokush, veçse vlerësimi se a duhet të mbahet një takim i tillë ose jo i përket ndërmjetësuesit, lehtësuesit siç e quajnë ata veten, përkatësisht zëvendës presidentit të Komisionit Evropian, Joseph Borrell dhe emisarit të tij Lajçak. Janë ata të cilët e vlerësojnë nëse na dërgojnë ftesat ose jo dhe jo çfarëdo kushtëzimi të palës tjetër”, njoftoi Kurti në një konferencë për media që mbajti të dielën.

Ai po ashtu tha se e mirëpret vendimin e Mbretërisë së Bashkuar për emërimin e një emisari të posaçëm për Ballkanin Perëndimor.

“Ne kemi nevojë për sa më shumë vëmendje të aleatëve dhe partnerëve perëndimorë në rajonin tonë, meqenëse qartazi vëmendja, investimet dhe ndikimi te fqinji ynë verior i fuqive, superfuqive nga Lindja apo Verilindja është rritur shumë kohët e fundit. Vëmendja e shtuar e Bashkimit Evropian, e Shteteve të Bashkuara, e NATO-s, e në veçanti e Mbretërisë së Bashkuar, unë besoj që është e mirëseardhur jo vetëm për Kosovën, por edhe për të gjithë politikanët dhe qytetarët që janë paqedashës në Ballkanin Perëndimor”.

Kryeministri i Kosovës, në konferencë, pos të tjerash foli edhe për rastin në Deçan, ku njoftoi se edhe pas 8 ditësh nuk ka asnjë të dyshuar. Para dhjetë ditësh, në Gllogjan u vranë tre persona, shoferi i autobusit dhe dy nxënës.

“Mua më vjen shumë keq që këtë të premte në darkë u bë një javë që nuk e kemi të pandehurin të identifikuar e as të arrestuar, rrjedhimisht ose të pandehurit. Ishte një vrasje mizore e trefishtë ku një i plagosur apo i lënduar kishte fat dhe sasia e informacionit me sa kam kuptuar nga policia është rritur për shkak të hetimeve të shtuara edhe me hetuesit më të mirë që i ka Republika e Kosovës, por ende nuk e kemi rezultatin”, u shpreh ai.