Shqetësueses e ka konsideruar komisionerja e Agjencisë për Informim dhe Privatësi, Krenare Sogojeva, numrin e qytetarëve që janë të informuar për ekzistimin e këtij institucioni.
Nga anketat, që Sogojeva thotë se janë zhvilluar në 6 qytetet më të mëdha të Kosovës, 40 për qind e tyre nuk kanë fare njohuri për një gjë të tillë.
“Kjo, në bazë të kësaj ankete shihet se informimi është shumë i ulët, domethënë nuk e dinë. Është rreth 60% siç e ceka, por gjithsesi nuk është i kënaqshëm dhe ne jemi në vazhdimësi duke punuar në ndërgjegjësimin e qytetarëve, por edhe të institucioneve për të ngritur vetëdijen për zbatimin e ligjit për qasjen në njërën anë nga ana e institucioneve publike po edhe në anën tjetër për realizimin e të drejtave të qytetarit për qasje në dokumente publike”, ka deklaruar Sogojeva.
Megjithëkëtë, komisionerja Sogojeva thotë se është vërejtur rritje e numrit të ankesave.
Sipas saj, lidhur me qasjen në dokumente publike, kanë pranuar 125 ankesa.
“85 prej këtyre ankesave janë shqyrtuar dhe mbyllur edhe pse agjencia e ka në misionin e saj vënien e gjobave si akt të fundit. Deri më tani në këto 85 ankesa raste të mbyllura ne nuk kemi shqiptuar gjobë, për faktin se institucionet kanë reflektuar dhe iu kanë dhënë qasje qytetarëve për kërkesat të cilat ata i kanë pasur ndaj institucioneve”.
Komisionerja e Agjencisë për Informim dhe Privatësi, thotë se ka rritje të numrit të ankesave sa u përket të dhënave personale. Nga 40 ankesa sa kanë pranuar gjithsej, 24 prej tyre janë shqyrtuar e mbyllur.
© KOHA. Të gjitha të drejtat janë të rezervuara.
