Me të ateruar dy avionët ushtarakë nga Bullgaria, u bënë edhe përgatitjet e fundit për ta filluar ceremoninë e bartjes së trupave të 45 personave që humbën jetën në aksidentin e komunikacionit që ndodhi javën e kaluar në afërsi të kryeqytetit bullgar.
Tashmë veturat transportuese filluan të vendosen në pistën e aeroportit të Shkupit, ndonëse me dy orë vonesë.
Ndonëse jo në numër të madh, të pranishëm ishin edhe familjarë të viktimave, kureshtarë për të ditur arsyet e vonesës.
Një ditë më parë, u paralajmërua se në sheshin kryesor të Shkupit, do të vendoseshin trupat e pajetë dhe se qytetarët mund të vendosnin lule e t’u jepnin lamtumirën.
Por, një gjë e tillë u anulua, për shkak se familjarët kishin kërkuar që trupat e viktimave t’u dorëzohen direkt atyre për t’i varrosur.
Megjithatë, në pistën e aeroportit të kryeqytetit maqedonas, shkuan krerët e shtetit të Maqedonisë së Veriut, presidenti Pendarovski, kryeparlamentari Xhaferi, kryeministri Zaev e shumë të tjerë. Nuk munguan as presidentja e Kosovës, Vjosa Osmani, e shoqëruar me ministren Rozeta Hajdari.
Bartjen e trupave nga aeroplani e deri te vetura, e bënë ushtarët, e trupi i fundit që doli nga aeroplani mbante edhe një lule të bardhë.
Teksa ende mbetet i panjohur shkaktari i aksidentit, selia e kompanisë “Besa Trans”, e cila po kthehej nga Stambolli, ishte e mbyllur edhe gjatë së premtes.
Fqinjët përreth, prapa kamerës thanë që nga dita e aksidentit nuk është hapur më.
Derisa qytetarët tregojnë se e kishin përjetuar rëndë aksidentin, shprehin ngushëllime për familjarët.
Mëngjesin e 23 nëntorit, 45 persona vdiqën në një aksident trafiku në autostradën “Struma” në afërsi të Sofjes, e që po konsiderohet si aksidenti më i rëndë në 10 vjetët e fundit.
© KOHA. Të gjitha të drejtat janë të rezervuara.
