Video

Koalicioni i ri qeverisës në Gjermani zotohet për mbështetje të dialogut Kosovë-Serbi

Dialogu mes Kosovës dhe Serbisë ka zënë vend në marrëveshjen e arritur për koalicionin qeverisës në Gjermani. Në dakordimin e tri partive, që të mërkurën arritën marrëveshje për bashkëqeverisje, thuhet se e mbështesin këtë proces.

“Duhet të hapen kapitujt e parë të anëtarësimit në BE me Shqipërinë dhe Maqedoninë e Veriut, të vendoset liberalizimi i vizave me Kosovën dhe të vazhdojnë negociatat me Malin e Zi dhe Serbinë. Ne mbështesim dialogun e normalizimit të udhëhequr nga BE-ja ndërmjet Kosovës dhe Serbisë dhe përpjekjet për të arritur paqe të qëndrueshme në Bosnjë-Hercegovinë, bazuar në ruajtjen e integritetit territorial dhe tejkalimin e ndarjeve etnike”, thuhet në marrëveshjen.

Përfshirja e Kosovës në marrëveshjen për Qeverinë e re gjermane është duke u konsideruar pozitive nga analisti i zhvillimeve në Ballkan, Enver Robelli.

“Në terma të përgjithësuar thuhet se Gjermania përkrah dialogun mes Kosovës dhe Serbisë për normalizim. Një mangësi e shoh këtu, që nuk përmendet njohja nga Serbia në mënyrë eksplicite, por në përgjithësi kemi një ripërkushtim ose ripërbetim ndaj Ballkanit”, tha kolumnisti i KOHËS, Robelli.

E sa i përket heqjes së vizave, Robelli nuk është shumë optimist.

“Sa i përket Kosovës thuhet se Gjermania përkrah liberalizimin e vizave. Kjo realisht nuk është diçka e re, por për shkak të bllokadës që ka bërë Franca nuk besoj që do të ketë ndonjë ndikim për fat të keq. Por, megjithatë, është shumë me rëndësi që Gjermania e thekson këtë që ka nevojë për t’u riaktualizuar çështja e liberalizimit të vizave”, tha Robelli.

Në marrëveshjen për koalicionin qeverisës përmendet edhe mbështetja e anëtarësimit të gjashtë vendeve të Ballkanit Perëndimor në Bashkimin Evropian.

“Ne mbështesim procesin e anëtarësimit në BE të gjashtë vendeve në rajonin e Ballkanit Perëndimor dhe reformat e nevojshme për të përmbushur të gjitha kriteret e Kopenhagës. Në këtë kontekst, ne po forcojmë shoqërinë civile dhe po mbështesim hapat e mëtejshëm të paraanëtarësimit”, thuhet në marrëveshja.

Pas arritjes së marrëveshjes, postin që deri më tani e ka mbajtur kancelarja Angela Merkel, pritet ta marrë Olaf Scholz. Socialdemokratët për koalicionin qeverisës arritën marrëveshje me Partinë e Demokratëve të Lirë dhe Partinë e të Gjelbërve.

Ky koalicion shënon zyrtarisht përfundimin e qeverisjes së ish-kancelares gjermane Angela Merkel. Marrëveshja 177-faqëshe është arritur pas rreth dy muaj diskutimesh, derisa tri partitë u zotuan për avancim në investimet publike, në teknologji të gjelbër dhe digjitalizim.