Dyzet e gjashtë persona kanë humbur jetën dhe shtatë të tjerë janë lënduar në aksidentin tragjik që ka ndodhur mëngjesin e së martës në autostradën “Struma” në Bullgari.
Të lënduarit në këtë aksident janë dërguar për trajtim në spitalin Pirogov në Sofje të Bullgarisë dhe thuhet se janë jashtë rrezikut për jetën. Autoritetet maqedonase kanë bërë të ditur se në mesin e viktimave janë 12 fëmijë. Të tjerët thuhet se janë të rinj të moshave 20-30-vjeçare.
Të gjithë pasagjerët në këtë autobus kanë qenë shtetas të Maqedonisë së Veriut, prej të cilëve shumica me kombësi shqiptare.
Autobusi, i cili është pronë e kompanisë “Besa Trans”, në momentin e aksidentit po kthehej nga Stambolli në Shkup. Autobusi është rrotulluar e më pas është përfshirë nga zjarri.
Gazetari maqedonas, Zekirija Mexhiti, ka deklaruar se ka familje të tëra që janë shuar, derisa në mesin e fëmijëve që kanë vdekur pati edhe binjakë.
“Është një tragjedi e rëndë. Kemi familje të tëra që janë shuar, kemi fëmijë binjakë, ka familje mbi 12-anëtarëshe që është shuar tërësisht në këtë tragjedi”, ka thënë Mexhiti.
Ai deklaroi se nga informacionet fillestare thuhet se autobusit paraprakisht i kishte shpërthyer goma e parme e djathtë, e cila më pas ka çuar në tërheqje zvarrë të autobusit.
Autobusi është përfshirë nga flakët, ndërsa jozyrtarisht thuhet se ka pasur karburant rezervë, i cili është ndezur.
Por shkaktarët e aksidentit tragjik zyrtarisht ende nuk janë bërë të ditur. Drejtori i Shërbimit Kombëtar të Hetimeve në Bullgari, Borislav Sarafov, ka thënë se shkak i aksidentit mund të jetë ndonjë gabim i shoferit apo ndonjë problem teknik me autobusin.
Ndërsa kryebashkiaku i komunës së Pernikut, Stanislav Vladimirov, ka thënë se nuk mund të përjashtohet si shkak i aksidentit edhe moti i keq.
Por sekretari i Këshillit të Sigurisë Rajonale të Pernikut, Vasko Pirgov, ka thënë se fillimisht autobusi goditi gomën e parë djathtas në një shenjë që fluturoi 45 metra përpara. Sipas Pirgovit, rruga ishte e përsosur dhe autobusi nuk ka rrëshqitur. Ai ka theksuar se autobusi po lëvizte më shpejtësi 100 kilometra në orë dhe se thjesht shoferi nuk ka reaguar siç duhet.
Të martën para zyrave të agjencisë “Besa Trans” në Shkup kanë qëndruar familjarë të të aksidentuarve.
Ata janë ankuar për mungesë informacionesh nga ana e institucioneve.
Xhelal Bakiu, i cili në autobusin e aksidentuar ka pasur një kushëri, ka thënë se nuk kanë marrë informacione nga institucionet lidhur me rastin.
“Ishte ora 6 e mëngjesit dhe e pashë lajmin. Prej momentit që e pashë këtë lajm kemi ardhur këtu, sepse në autobus e kisha kushëririn. Deri tash nuk kemi informacion. Së paku duhet të na informojnë për ata persona se a janë mirë, a kanë shpëtuar”, ka thënë Bakiu.
Në vendin e aksidentit ka dalë edhe kryetarja e Prokurorisë së Specializuar të Maqedonisë së Veriut, Vilma Ruskovska.
Ajo ka folur për dëshminë që ka dhënë pronari i kompanisë “Besa Trans”. Pronari i kompanisë ka thënë se në 20 vjetët sa operon kjo kompani transporti s’ka pasur asnjë incident. Po i kontrollojmë informacionet se kur është regjistruar autobusi, kur ka kaluar kontrollin teknik dhe do t’ua dërgojmë kolegëve tanë në Bullgari”, ka thënë Ruskovska.
Kryeministri i Maqedonisë së Veriut, Zoran Zaev, ka thënë se shpreson që tragjedia në Bullgari të bashkojë më tepër popujt e dy vendeve. Zaev ka treguar se është informuar për aksidentin vetëm pas dhjetë minutave nga kryeministri i Bullgarisë, Stefan Janev.
“Jemi bashkë në të mirë dhe në të keq. Jemi fqinjët e parë, popuj vëllazërorë, ndajmë gëzimet e hidhërimet”, ka thënë Zaev.
Ndërsa kryeministri i Bullgarisë, Stefan Yanev, i cili ka vizituar vendin ku ka ndodhur aksidenti, e ka quajtur atë “tragjedi të madhe”.
“Të shpresojmë se ne do të nxjerrim mësim nga ky aksident tragjik dhe të mund të parandalojmë aksidentet e tilla në të ardhmen”, ka thënë Yanev.
Pas aksidentit Qeveria e Maqedonisë së Veriut i ka shpallur tri ditë zie. Ndërsa seksioni i autostradës së Strumës ku ndodhi aksidenti do të mbetet i mbyllur edhe të mërkurën për shkak të inspektimeve.
© KOHA. Të gjitha të drejtat janë të rezervuara.
