Politizimi i institucioneve ka përplasur deputeten e PDK-së, Blerta Deliu-Kodra me zëvendëskryeministrin Besnik Bislimi. Gjatë raportimit të Bislimit në Komisionin Parlamentar për Integrim Evropian, Zhvillim dhe Dialog, deputetja e PDK-së ka thënë se për 7 muaj qeverisje, LVV-ja ka punësuar vetëm familjarë. Kjo është mohuar nga Bislimi, i cili ka thënë se institucionet i kanë gjetur të politizuara.
Deliu-Kodra ka thënë se do të pajtohej me Bislimin nëse ata si Qeveri do të punonin për depolitizim.
“Për këtë çështje nuk kemi çka i mbajmë leksione njëri-tjetrit. Sepse 7 muaj qeverisje dhe çka kemi parë gjatë kësaj kohe, emërime, dajë, halla, motra e teze”, është shprehur Deliu-Kodra.
Bislimi ka deklaruar se institucionet i kanë gjetur të politizuara.
mua është me rëndësi ajo që vazhdimisht po e potenconi, depolitizimi, se politizimi, për arsye se po pranohet që institucionet janë thellësisht të politizuara, edhe politizimin e ka bërë dikush nga subjektet që kanë drejtuar”, është shprehur zëvendëskryeministri.
Pas kësaj deklarate, deputetja e PDK-së ka lëshuar mbledhjen duke thënë se politizimin është duke e vazhduar qeveria aktuale.
Para se të largohej, Deliu-Kodra kritika ka pasur edhe sa i përket përkthimit të Raportit të Progresit, duke thënë se është referuar edhe në burime nga “Qeveria e Serbisë”.
“Për mua është shqetësuese zëvendëskryeministër, kush e përkthen dokumentin ose ‘Raportin e Progresit’, për mua është skandaloze, në faqen 3 të raportit thuhet... raporti bazohet në të dhëna nga një sërë burimesh, duke përfshirë kontributet nga Qeveria e Serbisë”, është shprehur Deliu-Kodra.
Ajo ka thënë se ky mund të jetë një gabim teknik pasi në gjuhën angleze në këtë pjesë thuhet “Qeveria e Kosovës”. Megjithëkëtë, ajo ka thënë se këto gabime është mirë të evitohen dhe se “Qeveria e Serbisë” nuk ka vend në këtë dokument.
Për përkthim, Bislimi ka thënë se kanë një kompani, e cila nuk është kontraktuar nga Qeveria Kurti. Referimin në “Qeveri të Serbisë”, Bislimi e ka quajtur lëshim të vogël.
“Konsideroj se ky është një gabim i vogël në raportet me ato gabime që ne i hasim për shkak se në të kaluarën kontratat e tilla të rëndësishme u janë dhënë kompanive të papërgjegjshme, të cilat ose e vonojnë, ose nuk dinë as ta përkthejnë. Këto kontrata nuk janë dhënë nga Qeveria Kurti”, ka theksuar Bislimi.
Në këtë mbledhje është folur edhe për procesin integrues të Kosovës.
Bislimi ka deklaruar se Qeveria e ka marrë me seriozitet procesin e integrimit evropian, duke shtuar se kanë çuar përpara numër të madh të proceseve që kanë ngecur me vite.
“Ne kemi analizuar me kujdes raportin që ka 43 faqe dhe kemi analizuar të gjitha gjetjet. Një problematikë që kemi vërejtur ka të bëjë që metodologjia u përgjigjet vetëm rrethanave në terren. Raporti flet për mungesë të shumicës parlamentare dhe i referohet periudhës para marsit. Qeveria Kurti 2 procesin e integrimit e ka marrë me prioritet të madh. Menjëherë kemi aktivizuar mekanizmat tanë”, është shprehur ai.
Zëvendëskryeministri ka thënë se në gjashtëmujorin e qeverisjes janë përpjekur të japin energji të re dhe t’i shtyjnë përpara çështjet e caktuara.
“Për herë të parë kjo qeveri e ka kthyer terminalin Trepça. Një problem tjetër ka të bëjë me transferin e inspektorëve komunalë. Problemi tjetër ka të bëjë me homologimin e veturave, që është hequr nga Qeveria Kurti. Pastaj në fushën e sundimit të ligjit ka pasur progres të kufizuar”, ka theksuar Bislimi.
Tek Agjenda e Reformave Evropiane ka thënë se janë duke punuar me strategji. “Si pjesë e reformës jemi duke punuar në hartimin e Ligjit për subjektet politike. Jemi të vetëdijshëm se ka hapësirë për avancim të kornizës ligjore”, është shprehur Bislimi.
© KOHA. Të gjitha të drejtat janë të rezervuara.
