Video

Paralajmërohet bllokimi i sistemit shëndetësor dhe arsimor nëse nuk nis zbatimi i Ligjit për paga

Punëtorët shëndetësorë kanë protestuar para Qeverisë së Kosovës, duke shprehur pakënaqësitë e tyre për mosaprovimin e Ligjit të ri për paga. Ata kanë paralajmëruar se nëse nuk miratohet deri në fund të vitit dhe nëse nuk fillon zbatimi i tij në janar, do ta bllokojnë sistemin shëndetësor. Edhe Sindikata e Arsimit ka paralajmëruar grevë në janar nëse nuk nis zbatimi i këtij ligji

Dhjetëra mantela të bardhë janë hedhur para ndërtesës së Qeverisë nga punëtorët shëndetësorë në shenjë pakënaqësie për mosmiratimin e Ligjit për paga. Ata kanë kërkuar nga ekzekutivi që brenda këtij viti të procedojë ligjin në Kuvend dhe nga janari i vitit të ardhshëm të fillojë implementimi i tij. Nëse kjo nuk ndodh, kanë paralajmëruar edhe bllokim të sistemit shëndetësor.

Kryetari i Federatave të Sindikatave të Shëndetësisë, Blerim Syla, ka ngritur dyshime se ekzekutivi po punon fshehtë në këtë projektligj.

“Kërkesa jonë e vetme është Ligji i pagave, një ligj i cili kishte me sjellë barazi sociale me të cilin slogan ka ardhur edhe Qeveria aktuale, por kjo nuk po ndodh. Qeveria në mënyrë të fshehtë punon pa ftuar përfaqësuesit, jo vetëm të sindikatave, por edhe të shoqërisë civile. Andaj, ne sot kemi dalë t’i themi stop kësaj jotransparence dhe kemi dalë t’i lajmërojmë se nëse Ligji i pagave nuk shkon sivjet kjo protestë do të kthehet në reagime edhe më të ashpra sindikale”, ka thënë Syla.

Deri në javën e ardhshme FSSHK-ja do të presë që të reagojë Qeveria, në të kundërtën Syla tha se nuk garanton se nuk do të ketë bllokim të sistemit shëndetësor.

“Neve ato papuçe që siç po e shihni kanë mbetur të zbrazura e që kanë me mbetur me mijëra e mijëra, sepse truri i Kosovës falë politikave të gabuara që jeni duke i bërë është kah shkon. Prandaj, e keni shansin e fundit. Ne edhe një javë ditë do të presim duke respektuar edhe kampanjën zgjedhore, ndërsa duke filluar nga java e ardhshme nuk garantoj se nuk do të fillohet me bllokimin e sistemit shëndetësor”, ka theksuar ai.

Në përkrahje të kësaj proteste kanë dalë edhe Bashkimi i Sindikatave të Pavarura të Kosovës dhe Sindikata e Bashkuar për Arsim, Shkencë dhe Kulturë.

“Do të jemi çdo herë përballë kërkesave të të gjitha sindikatave kur ata kanë nevojë. Në këtë rast kërkoj nga Qeveria e Kosovës që sa më shpejt t’i thërras sindikatat për dialogun social dhe sa më shpejt ministrat e Qeverisë së Kosovës t’i thërrasin sindikatat, që kanë nevojë për dialogun social dhe që sa më shpejt të fillojë dialogu social”, ka thënë Atdhe Hykolli nga BSPK-ja.

Edhe kryetari i SBASHK-ut, Rrahman Jashari, ka paralajmëruar grevë në sistemin arsimor nëse nuk fillon Ligji i pagave në janar.

“Nëse Ligji nuk punohet bashkë me sindikata dhe të shkojë e të fillohet nga janari së implementuari, atëherë sistemi arsimor do të jetë i tëri i bllokuar dhe do të kemi greva dhe do të kemi humbje orësh dhe për këtë ne nuk jemi fajtorë”, ka theksuar Jashari.

Punëtorët shëndetësorë edhe gjatë muajit shtator kishin protestuar simbolikisht para Qeverisë së Kosovë dhe Ministrisë së Shëndetësisë.

Ligji për paga sipas planit legjislativ parashihet që të miratohet në dhjetor në Qeveri. Megjithatë, kostoja e këtij ligji nuk është përfshirë në projektbuxhet për 2022, i cili ka kaluar në Qeveri më 29 tetor.