Jonathan Elystan Rees, avokati që e përfaqëson kreun e OVL-UÇK-së, Hysni Gucati, e ka sfiduar ashpër dëshmitarin e tretë, në seancën e së enjtes, mbajtur në Hagë.
Miro Jukiq, pjesë e Zyrës së Prokurorit të Specializuar, u përball me pyetje për periudhën kur dyshohet se dokumente të Speciales u shpërndanë nga ish-krerët e organizatës së veteranëve të UÇK-së. Asokohe, ai ishte udhëheqës i ekipit për siguri dhe trajtim të dëshmitarëve.
Rees u ndal sidomos te shënimet që dëshmitari thotë se i ka marrë gjatë punës së tij në lidhje me këtë rast. Sipas shpjegimeve që u dhanë në seancë, brenda ZPS-së ekziston një sistem elektronik i brendshëm i quajtur “ZaeLab”, ku përcillen dokumentet që përpilohen nga punonjësit e saj, për rastet që janë në proces e sipër. Pikërisht ishte pika në të cilën avokati gjeti shumë mospërputhje.
Më 22 shtator të vitit 2020, Jukiq kishte marrë shënime nga dëshmitarë, për rrezikun ndaj tyre pas ekspozimit i cili dyshohet se iu bë nga krerët e OVL-UÇK-së.
“Më 15 mars 2021, e identifikuat dhe e dërguat në ZaeLab(sistem), po ju pyes përsëri, pse nuk e dërguat përpara datës 27 tetor kur ishit në zyrë, duke dorëzuar dokumente pikërisht për këtë çështje”, ka thënë avokati Rees.
“Sepse e pashë edhe njëherë dosjen, nuk e kontrollova nëse ishte futur në ZaeLab”, u përgjigj dëshmitari.
“A pajtohemi me një gjë se shpjegimi juaj për këtë gjë, që ka të bëjë me pandeminë që thoni, ishte gënjeshtër në fakt?” ka qenë pyetja e radhës e Reesit.
“ Jo”, u përgjigj ai.
Mospërputhja e datave ka bërë që komunikimi mes avokatit e dëshmitarit të ashpërsohet edhe më tutje. Avokati Rees madje ka shkuar deri në konstatimin se secili arsyetim i dëshmitarit është mashtrim, shkresat në sistem janë futur nga shkurti e tutje, e jo kur pretendohet se kanë takuar dëshmitarët.
“Ju keni qenë në zyrë në tetor, në janar dhe në shkurt, pse nuk e keni dorëzuar këtë shënim atëherë, nëse kjo që thoni ka ndonjë të vërtetë?”, ka pyetur avokati.
“Ju po vini në dyshim dëshminë time?”, është përgjigjur me pyetje dëshmitari.
“Po, po them se po gënjeni dhe po sajoni lloj-lloj rrëfimesh për të shpjeguar mospërputhjet me data, të cilat unë po ju them se kanë shpjegim të dukshëm se nga shkurti e tutje ju është kërkuar të filloni të përgatisni dokumente dhe keni krijuar dokumente për ngjarje që kanë ndodhur, në fakt muaj përpara, këtë po ju them”, vazhdoi avokati.
Si në asnjë seancë më parë, përfaqësuesit e Prokurorisë së Specializuar kanë kundërshtuar pyetjet e avokatit Rees, por që këto kundërshtime ua ka hedhur poshtë gjyqtari.
Miro Jukiq është dëshmitari i tretë në gjykimin ndaj ish-krerëve të Organizatës së Veteranëve të Luftës së UÇK-së. Ai dëshminë e tij do ta vazhdojë edhe të premten, ku do të intervistohet nga mbrojta e të akuzuarit tjetër Nasim Haradinaj.
Hysni Gucati e Nasim Haradinaj po qëndrojnë në paraburgim në Hagë, prej 25 shtatorit të vitit 2020, kur edhe u arrestuan në Prishtinë.
© KOHA. Të gjitha të drejtat janë të rezervuara.
