Qeveria nuk do ta shtyjë përpara kërkesën e serbëve për Asociacionin, pavarësisht obligimeve të trashëguara nga marrëveshjet e kaluara. Kështu ka thënë ministrja e Punëve të Jashtme, Donika Gërvalla, gjatë raportimit në Komisionin Parlamentar për Integrime Evropiane. Në fillim të raportimit, pas kërkesës së deputetëve që të raportojë për procesin e integrimit në BE, Gërvalla tha se e ka keqkuptuar temën pasi ka ardhur që të raportojë për politikë të jashtme.
Ballkan, Asociacioni i Komunave Serbe janë dy tema që i kemi analizuar dhe janë të dëmshme. Po themi janë të dëmshme dhe të punojnë që t’ua shpjegojmë atyre që ia duan të mirën se janë të dëmshme. Asociacioni e krijon një Bosnjë të dytë në Kosovë. Nuk duam të paralizohemi si Bosnja. Nuk e kemi luksin t'i zbatojmë marrëveshjet që janë të dëmshme”, ka thënë Gërvalla.
Por opozita ka kritikuar Qeverinë për mungesë qartësie sa u përket këtyre temave.
“Veprimet e fundit që po ndodhin në Bosnjë-Hercegovinë duhet të jenë një alibi që të kërkohet prej Bashkimit Evropian mos me u përsëritë e njëjta edhe këtu. Marrëveshja e Dejtonit e ka bërë Bosnjën një shtet jofunksional. Nuk duhet lejuar të bisedohet për ndarje apo bosnjëzim të Kosovës, sepse kjo na bën një vend jofunksional”, ka thënë anëtarja e Komisionit, Time Kadrijaj (AAK).
Shefja e diplomacisë është pyetur nga deputetët edhe për anëtarësimin e Kosovës në organizata ndërkombëtare e çështjen e gazit.
“Do të pyesja për UNESCO-n, sepse ka pasur deklarata kontradiktore. Është thënë që do të ketë përgatitje për anëtarësim në UNESCO, ndërkohë që ministri Sveçla tha se Kosova nuk do të aplikojë për anëtarësim. Po ashtu e dimë se ka pasur heqje dorë nga Kushtetuta duke abstenuar nga aplikimi për anëtarësim”, ka thënë Blerta Deliu-Kodra (PDK).
Por ministrja nuk ka treguar se kur synohet aplikimi teksa ka folur në terma të përgjithshëm për strategjinë e anëtarësimit në organizata ndërkombëtare.
“Përveç piketimit ka nevojë për strategji të mirëfilltë. Cilat organizata janë të rëndësishme edhe për jetën e përditshme, për shembull OBSH-ja, ku synimi duhet të jetë për shërbim në të mirë të qytetarëve. Një strategji afatgjate na ruan nga gabimet në proces. Bëjmë identifikimin e organizatave dhe si t’i qasemi secilës veç e veç. Nëse dështojmë është dëmi shumë më i madh sesa të rezervohemi në aplikime edhe për disa muaj. Nuk mund të them sot apo aplikojmë në UNESCO apo jo, për të lehtësuar punën, sepse përpiqemi të tregohemi se jemi partner serioz që nuk i marrim vendimet politike me kryeneçësi”, ka thënë ajo.
E përplasje mes deputetëve dhe ministres kanë shkaktuar deklaratat e mëhershme të Gërvallës.
“Keni dhënë një mori deklaratash të cilat kanë rënë ndesh me qëndrimet e shtetit të Kosovës, duke filluar me ato në Këshillin e Sigurimit, ku keni thënë jemi të hapur për dialog të hapur me Serbinë për të kaluarën tonë të përbashkët dhe shpresoj edhe për të ardhmen tonë të përbashkët. Deklarata kundër përfaqësuesve të UÇK-së, gabimet në Twitter, huqja e flamurit. A mendoni se kanë ndikuar në zbehjen e imazhit të shtetit të Kosovës”, ka potencuar kryetarja e Komisionit, Valentina Krasniqi.
“Këto që thoni të dëmshme është konstatimi juaj, nuk do të thotë se e keni të saktë atë që po thoni. Ju po lexoni ato që kanë thënë të tjerët, pra pasaktësi, për mua, e jo ato që vërtet i kam thënë”, është kundërpërgjigjur ministrja.
Pjesa e dytë e mbledhjes ka vazhduar me dyer të mbyllura, pasi ministrja tha se ka çështje të ndjeshme, të cilat dëshiron t’i diskutojë në mirëbesim të komisionit.
© KOHA. Të gjitha të drejtat janë të rezervuara.
