Prishtinë, 1 nëntor - Profesorët e gjimnazit “Sami Frashëri” kanë vazhduar bojkotimin e mësimit, shkaku i përzgjedhjes së drejtoreshës Fahrie Retkoceri. Për këtë shkak, gjatë së hënës kjo shkollë është vizituar edhe nga ministrja e Arsimit, Arbërie Nagavci.
Por drejtoresha e shkollës, Fahrie Retkoceri, ka pranuar që është takuar me ministren, por nuk ka folur për atë që është diskutuar në takim. Ka thënë se pret nga shteti që të bëjë zgjidhje për situatën në të cilën ndodhet.
“Kam pasur takime dhe jam kërcënuar nga ta dhe tash jam larguar nga takimi me ta. Kërcënim që nuk guxon me hy brenda, kjo është salla jonë, e shumë kërcënime të tjera. Unë e kam një kontratë nga organet kompetente dhe nuk kam dashur të dalë para mediave e t’i trazoj nxënësit dhe prindërit, sidomos familjen time, edhe kjo ka qenë vetëm pse jam femër”, ka thënë ajo.
Procesi i përzgjedhjes së drejtoreshës Fahrie Retkoceri në gjimnazin “Sami Frashëri” në Prishtinë po konsiderohet i paligjshëm nga Ministria e Arsimit.
Nga MASHTI kanë thënë se kanë kërkuar nga Komuna e Prishtinës që ta anulojnë konkursin, por këta të fundit nuk e kanë bërë një gjë të tillë. Si pasojë, Inspektorati i Arsimit ka bërë kallëzim penal ndaj Komunës.
Kundër bojkotimit të mësimit ka dalë profesoresha e kimisë, Florie Rusinovci, e cila që nga fillimi i kësaj greve ka mbajtur procesin e mësimit.
“Në këtë formë nuk po pajtohem, nuk është në natyrën tonë dhe ka kush merret me këtë punë, dhe çdo humbje e mësimit është humbje kohe, e sidomos për mësimdhënësit. Kush e ka sjellë këtë drejtoreshën këtu edhe mundet ta largojë dhe personalisht nuk mundem të bëj asgjë e as stafi, pra ajo është zgjedhur nga DKA-ja dhe ata e largojnë, dhe unë pajtohem me këtë vendim të saj”, ka theksuar ajo.
Këshilli i Prindërve në Prishtinë ka thënë se kërkesat e mësimdhënësve për bojkotimin e mësimit në gjimnazin “Sami Frashëri” janë të pajustifikueshme. Ata u kanë bërë thirrje institucioneve vendimmarrëse për arsimin në kryeqytet: Komunës së Prishtinës, Inspektoratit të Arsimit dhe Ministrisë së Arsimit që pa asnjë vonesë të marrin masa që bojkotimi të ndërpritet dhe mësimi të rifillojë.
© KOHA. Të gjitha të drejtat janë të rezervuara.
