Qeveria anulon shpronësimin e pronave në segmentin Kijevë-Klinë-Zahaq

Sipas arsyetimit të kryeministrit Albin Kurti, një vendim i tillë është marrë pas shkeljeve të bëra.

“Pas gjetjeve të auditorit që shpërfaqin shkelje të shumta në procesin e shpronësimit për interes publik, dhe me qëllim të ndaljes së keqpërdorimeve dhe abuzimit të parasë publike përkatësisht për shpërputhjen prej 12 milionë euro ministri Murati ka dërguar këtë rast në prokurorinë speciale dhe sot edhe formalisht po e anulojmë këtë proces të dëmshëm”, tha Kurti.

Kurse ministri i Financave tha se përveç mospërputhjes së vlerësimeve të bëra fillimisht e atyre të miratuara në qeveri, auditori ka gjetur edhe shkelje të tjera.

“Segmenti në fjalë fillimisht ishte vlerësuar në shumën prej 31 milionë euro e 40 mijë e 729 euro. Pas këtij vlerësimi, qeveria pas procedimit të propozim vendimit nga ministria, qeveria kishte miratuar shpronësimin mirëpo por me tabela të tjera e që parcelat e njëjta në total vlerësoheshin në shumë 43 milionë euro e 462 mijë e 580 euro”, tha ministri i Financave, Hekuran Murati.

Ekzekutivi ka para vetes disa variante për ndërtimin e rrugës Prizren-Tetovë.

Pas formimit të komisionit për vlerësimin e fizibilitetit për këtë rrugë, ministri i Mjedisit, Liburn Aliu, ka thënë se ndërtimi i saj pritet të kushtojë 150 milionë euro.

“Lartësia mbidetare dhe kushtet në teren përcaktojnë këto variante, ku varianti më i përshtatshëm është ai i cili ka de fakto tunelin më të gjatë, 6.4 km dhe është mbi fshatin Manstrici nga ana e Kosovës dhe kalon në anën tjetër afër fshatit Bozofc në Maqedoninë e Veriut dhe pastaj mund të lidhemi në Tetovë”, tha Aliu.

Ndër të tjerash, kabineti qeveritar ka miratuar rregulloren që regjistrimi i veturave të bëhet pa pasur nevojë të paguhet tatimi në pronë. Derisa ka vendosur edhe masa sanksionuese ndaj shtatë individëve dhe një kompanie të lidhur me organizatën terroriste Hezbollah.

© KOHA. Të gjitha të drejtat janë të rezervuara.