Është krejt e zakonshme për një gazetar që të mbulojë një konferencë për media, por ish-gazetarit të portalit Infokus, Halil Berisha, i është dashur të dëshmojë në Gjykatë Speciale për mbulimin e një ngjarjeje të tillë.
Ai ka dëshmuar para Dhomave të Specializuara, në procesin gjyqësor kundër ish-krerëve të OVL-UÇK-së, Hysni Gucatit e Nasim Haradinajt, të cilët po ndiqen për pengim në administrimin e drejtësisë.
Deklarimin e tij e ka nisur me pakënaqësinë që ishte i ftuar për të dëshmuar.
“Desha të them se nuk jam shumë i lumtur që sot jam këtu për të dëshmuar para jush, kjo nuk do të pengojë faktin të them të vërtetën, jam këtu dhe më keni obliguar, por nuk jam i lumtur që jam këtu”, ka thënë Berisha.
Ai i shoqëruar nga avokati Arianit Koci pasditen e së martës u është përgjigjur pyetjeve të prokurorit.
Nga ky institucion e kanë pyetur se për çfarë ishte pjesëmarrës në konferencën e ftuar nga OVL e UÇK-së, në shtatorin e vitit 2020 dhe çfarë dokumentesh kishte marrë nga kjo konferencë.
“Numri i dokumenteve ishte goxha i madh dhe nuk kishte mundësi që.. nuk e dishim edhe saktë se çfarë kishte në to. Nuk kishte pasur mundësi të xhirohen krejt dhe kështu e kam kërkuar një pjesë të dokumenteve.. Isha aty afër bashkë me të gjithë gazetarët dhe aty veç kam pyetur se a mund t’i marr një pjesë të dokumenteve. Mendoj që diku rreth 1 mijë faqe ndoshta”, është shprehur Berisha.
Ai është pyetur nga prokurori edhe nëse kishin hasur në dokumente konfidenciale dhe si i kishin trajtuar ato.
”Ka disa shkrime për të cilat jemi kujdes, për të paktën për ato që shkruhej se janë ‘Konfidenciale’, jemi kujdes që ato mos me u publiku”, shtoi ai.
Gazetari Berisha dëshminë e tij do ta vazhdojë edhe të mërkurën.
Gjatë ditës e ka përfunduar dëshminë e saj koordinatorja e hetimit në Zyrën e Prokurorit të Specializuar (ZPS), Zdenka Pumper. Ajo dëshminë e saj e ka filluar më 18 tetor.
Hysni Gucati së bashku me Nasim Haradinajn po akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.
© KOHA. Të gjitha të drejtat janë të rezervuara.
