Partia Demokratike e Kosovës ka kritikuar ministren e Jashtme, Donika Gërvalla, për injorimin që po ia bënë Kuvendit.
Deputetja e PDK-së, Ariana Musliu-Shoshi, në një tryezë ku u fol për reformat në shërbimin e jashtëm, ka thënë se Kosova është në pauzë sa i përket politikës së jashtme.
Por ministren dhe politikat që ajo po i ndjek i ka arsyetuar deputeti i LVV-së, njëherësh kryesues i Komisionit për Punë të Jashtme, Haki Abazi.
“Ne kemi një ministre e cila nuk vjen të raportojë në Komision për punë të jashtme, pra ka qenë vetëm një herë dhe kjo ka ndodhur në fillim të qershorit dhe më nuk është dukur në Kuvend. Lëre më që nuk vjen në Komision, mirëpo nuk vjen as edhe në Kuvend. E keni parë. Unë në çdo seancë kam pyetje parlamentare për të”, tha Musliu-Shoshi.
“Me idenë që me i qitë nëpër portale personale informacionet. Nuk bën kështu. Nuk duhet të marrë më deputeti mëditje për të prodhuar lajm për portale e fake news e portale kriminale që shantazhojnë zyrtarë publikë edhe duan të mbajnë takime zyrtare. Kur thirren zyrtarët publikë, ministrat, po ashtu duhet të ekzistojë njëfarë respekti për institucionin, duhet me u kap për fakti e jo për bombën që hidhet në takim për të eksploduar një lajm i cili bëhet medial në anën tjetër”, tha Abazi.
Ndërkohë, shoqëria civile ka kërkuar ristrukturim të kësaj ministrie përbrenda, ndërsa kanë theksuar se primare për shërbimin e jashtëm është meritokracia.
“Ne mund ta bëjmë ligjin më të mirë, por nëse nuk kemi planifikim të mirëfilltë brenda Ministrisë së Punëve të Jashtme nuk do të funksionojë. Për këtë të jeni të bindur, planifikimi është ABC-ja”, deklaroi Lulzim Peci nga KIPRED.
“Duhet të konsiderohet mundësia e vlerësimit të aftësive, pra mos të bëhet me automatizëm siç është sot, por të krijohen edhe disa mekanizma që e zgjedhin atë që është më i miri”, tha Naser Shamolli nga GLSP-ja.
Lidhur me aftësimin GLSP-ja ka propozuar edhe trajnime të vazhdueshme të obligueshme në përfundim të periudhës së vlerësimit të rezultateve në punën e personelit diplomatik dhe konsullor.
© KOHA. Të gjitha të drejtat janë të rezervuara.
