Video

MASHTI bën thirrje për lirim të masave për sektorin e arsimit. Masat aktuale në fuqi edhe për një javë

Shumica e shkollave në Kosovë janë duke mbajtur mësim me prezencë fizike e orë të plota, por nga Ministria e Arsimit bëjnë thirrje që zbutje të masave së pari të ketë në sektorin e arsimit, pasi që numri i të vaksinuarve është i lartë. Masat aktuale mbesin në fuqi deri javën tjetër

Edhe për një javë, mësimi në shkolla do të bëhet me skenarë të ndryshëm. Zëvendësministri i Arsimit, Dukagjin Pupovci, thotë që kanë kërkuar nga institucionet për menaxhim të pandemisë, që të lirohen masat së pari në sektorin e arsimit.

“Në rast se duhet të ketë zbutje të masave, së pari duhet të bëhet në sektorin e arsimit. Pra, në rast se do të ketë zbutje të masave, siç janë heqja e kufizimit për numrin e personave, maskave etj., së pari duhet të zbatohet në arsim. Kjo e ka arsyen e vet, në shkolla e kemi prezencën më të madhe të personave të vaksinuar”, ka thënë Pupovci.

Ndërkaq, Këshilli i Prindërve ka bërë thirrje për respektim të masave me qëllim mbrojtjen e nxënësve nga COVID-19, deri në një vendim tjetër.

“Ne si këshill i prindërve mendojmë që secila shkollë duhet të respektojë rekomandimet e Institutit Kombëtar të Shëndetit Publik për mbrojtje nga COVID, deri në një vendim tjetër për masat. Kemi kërkuar që mësimi të zhvillohet me prezencë fizike në klasa dhe të rregullohet sipas kapaciteteve që kanë shkollat. Nëse këto rekomandime nuk respektohen, duhet Inspektorati të veprojë”.

Nga 779 shkolla fillore dhe të mesme, 539 punojnë me skenarin e rikthimit të plotë. 227 shkolla punojnë me skenarin A, por me orar të shkurtuar. Janë vetëm 13 shkolla që punojnë me skenarin B.

Në shkollat që janë qendra të votimit, të hënën, nuk do të zhvillohet mësim me prezencë fizike. Ministria e Arsimit ka njoftuar se këto shkolla duhet që më 18 tetor të kalojnë në mësim online për një ditë.

“Siç e dimë zgjedhjet mbahen më 17 tetor dhe kemi marrë vendim që me datë 18 tetor, shkollat që janë qendra të votimit të punojnë me skenarin C, ndërkaq ato që nuk janë qendra të votimit të vazhdojnë me skenarët që i kanë aplikuar deri atë ditë”, ka deklaruar zëvendësministri i Arsimit, Dukagjin Pupovci.

Masat aktuale vazhdojnë të jenë në fuqi deri në fund të javës që vjen, orari i lëvizjes është nga ora 22 deri në 5 të mëngjesit e në hapësira të mbyllura nuk lejohen më shumë se 20 persona.

Në konferencë për media, sa u përket teksteve shkollore zëvendësministri ka hedhur fajin mbi drejtoritë komunale të Arsimit që nuk kanë paraqitur të dhëna të sakta.

“Sipas udhëzimit administrativ, tekstet shkollore duhet të ripërdoren. Pra, shkollat i mbledhin në fund të vitit dhe rishpërndahen. Më 15 qershor, MASHTI ka dërguar njoftimin se këtë vit shkollor do të ndajë tekstet shkollore për klasat 1-5. Ndërsa, për të tjerat shkolla t’i mbledhë e t’i shpërndajë. MASHTI ka reaguar duke i dërguar komisionet për të parë nëse i kanë dërguar. Kemi gjetur se shpërndarja është bërë si duhet, por edhe kemi gjetur se ka pasur kërkesa jo në përputhje me numrin e nxënësve. Ftojmë DKA-të dhe shkollat të sigurohen se i kanë informacionet e sakta dhe nëse ka sa duhet tekste”, ka thënë zëvendësministri Pupovci.

Kostoja e teksteve shkollore ka arritur diku mbi 8 milionë euro, ka njoftuar Pupovci.