Goditja e krimit dhe demaskimi i përpjekjeve destruktive të Serbisë e bëjnë të suksesshëm aksionin kundër krimit të organizuar në veri dhe disa qytete të tjera të Kosovës e jo shkarkimi i ministrit për Komunitete dhe Kthim, Goran Rakiq, ka thënë kryeministri Albin Kurti, në arsyetimin e dhënë rreth vendimit që do të merret pas deklaratave të liderit të serbëve të Kosovës. Rakiq të mërkurën në shenjë revolte me aksionin e Policisë së Kosovës ka kërcënuar se herën tjetër nuk do të lejojnë të tilla veprime, pavarësisht se ato, sipas zyrtarëve të Qeverisë, ishin drejtuar kundër të dyshuarve për kontrabandë, pa dallim etnie, e jo kundër qytetarëve serbë.
Kreu i Ekzekutivit, Albin Kurti, pas pjesëmarrjes në disa aktivitete në kuadër të fushatës zgjedhore të Lëvizjes Vetëvendosje në Prizren tha se e kanë goditur nervin e krimit të organizuar, korrupsionit e kontrabandës.
“Përveçse po kemi sukses me hetimet tona intensive, në të njëjtën kohë po ndodh një demaskim gjigant i Serbisë sa i përket përpjekjes së saj destruktive me strukturat saj ilegale në Kosovë”, ka deklaruar Kurti.
E për shkak të kësaj, shkarkimi i Goran Rakiqit, sipas tij, nuk është i nevojshëm.
“Qartazi ne jemi në rrugën e drejtë dhe pikërisht për shkak se ne jemi në rrugën e drejtë, Serbia e Vuçiqi nuk po arrijnë t’i mobilizojnë serbët kundër veprimeve të drejta e të ligjshme të Qeverisë sonë. Ne kemi goditur nervin e çështjes. Çështja nuk është Rakiqi. Shkarkimi i tij do ta bënte çështje”, ka thënë Kurti.
Ministri Rakiq, e që është edhe kryetar i Listës Serbe, pas aksionit të Policisë së Kosovës, ka marrë pjesë në takimin me presidentin e Serbisë, Aleksandër Vuçiq. Para nisjes së takimit, Rakiq ka thënë se do të kërkojnë mbrojtjen e serbëve.
“Do të kërkojmë konkretisht a mund të na ndihmojë apo jo, a dëshiron të na ndihmojë apo jo, por duhet ta kemi këtë informatë qysh sot, pasi për ne është çështje jetë a vdekje”, ka thënë ministri i kabinetit qeveritar, të mërkurën.
E gjatë takimit të mbajtur në Rashkë, në të cilin, përveç përfaqësuesve serbë, kanë marrë pjesë edhe dhjetëra qytetarë, Rakiq ka paralajmëruar ndërmarrjen e veprimeve të tjera në rast se përsëriten veprimet e institucioneve të Kosovës, pjesë e të cilave është edhe vetë ai.
“Herën tjetër nëse vjen deri te një rast i tillë nuk do të mbetet me kaq, serbët do të mbrohen”, ka thënë Goran Rakiq.
Por veprimet e ministrit të Qeverisë Kurti nga shoqëria civile janë duke u konsideruar arsye e mjaftueshme për ta shkarkuar. Gëzim Shala, hulumtues në Institutin e Kosovës për Drejtësi, thotë se roli i Qeverisë së Kosovës është që të mbrojë rendin kushtetues dhe juridik të shtetit.
“Është jashtëzakonisht problematike nëse nga Qeveria e Kosovës vijnë zëra të kësaj natyre dhe veprime të kësaj natyre që kanë të bëjnë me cenimin e rendit juridik dhe kushtetues të Republikës së Kosovës”, thotë Shala.
Derisa përmend veprimet e Lëvizjes Vetëvendosje, gjatë kohës sa ishte në opozitë, kundrejt deklarimeve të ish-ministrave serbë, Shala thotë se qasja aktuale është “jashtëzakonisht e çuditshme dhe në kundërshtim me praktikat që ka vepruar më herët”.
“VV-ja ka qenë ajo që ka organizuar protesta, pas të cilave kërkesa z. Mustafa ka shkarkuar z. Jabllanoviq dhe që në fakt në atë kohë është përshëndetur dhe përshëndeten edhe sot për faktin se për veprimet e tilla ministrat duhet të mbahen përgjegjës”.
E nëse do të vazhdojë të mbajë në kabinet një ministër, duke pasur parasysh kundërshtimet që si kryetar i Lëvizjes Vetëvendosje ka bërë gjatë kohës sa ishte në opozitë, nuk ka pranuar të përgjigjet Albin Kurti. Pyetjes për një gjë të tillë, Kurti i është përgjigjur me ironi, duke kërkuar që të dëgjohet përsëri deklarimi i bërë në fillim për çështjen e shkarkimit të Rakiqit.
Përveç takimit me Vuçiqin e kërkesave drejt tij për mbrojtjen e serbëve në Kosovë, ministri për Komunitete dhe Kthim, Goran Rakiq, ka krahasuar aksionin e Policisë së Kosovës me atë të gjermanëve nazistë kundër çifutëve, të ashtuquajtur "Nata e Kristaltë". Po ashtu, të mërkurën është raportuar se një nga kamionët e përdorur për të bllokuar rrugët në veri është nga kompania “Standart”, pronar i së cilës figuron të jetë ministri për Komunitete dhe Kthim, Goran Rakiq.
Ndërmarrjen e masave lidhur me një mundësi të tillë e ka paralajmëruar, një ditë më parë, ministri i Punëve të Brendshme, Xhelal Sveçla.
“Tash po dëgjoj se ministri Rakiq paska kompani, është çështje e hetimeve policore, do të kërkoj nga drejtori i policisë që kjo të hetohet në detaje dhe nëse del kështu, të merren masa ligjore. Askush nuk është mbi ligjin. Kushdo që shkel ligjin, do të vihet para drejtësisë”, ka thënë Sveçla në konferencë për media pas aksionit të Policisë së Kosovës në luftim të kontrabandës.
Aksioni i së mërkurës i Policisë së Kosovës në Mitrovicën e Jugut, në atë të Veriut, në Zveçan, Prishtinë e Pejë ka rezultuar me tetë persona të arrestuar, tre prej të cilëve janë liruar në procedurë të rregullt derisa dhjetë të tjerë janë ende në kërkim.
Ky aksion ka nxitur që qytetarët nga komunat veriore të protestojnë e të cilët përveç përdorimit të mjeteve shpërthyese kanë bllokuar për disa orë edhe rrugët. Si pasojë e dhunës janë lënduar dhjetë pjesëtarë të Policisë së Kosovës. Nga protestuesit janë sulmuar edhe gazetarët.
© KOHA. Të gjitha të drejtat janë të rezervuara.
