Raportimi para komisionit parlamentar i përgjegjësve kryesorë për aksionin e njësisë speciale në veri të Kosovës është përcjellë me përplasje verbale e pa opozitën prezente.
Paraqitja e përbashkët para deputetëve ministrit të Punëve të Brendshme, Xhelal Sveçla dhe e drejtorit të Policisë, Samedin Mehmeti, u kundërshtua ashpër nga kryetari i komisionit për Çështje të Sigurisë, Bekë Berisha.
Sipas tij, ftesa ka qenë për raportime të ndara por Sveçla tha se ka të drejtë të zgjedhë vet se me kë dëshiron të vijë në komision.
Përplasjet verbale çuan në tensionimin e situatës, e deri në largimin e Sveçlës dhe Mehmetit
Krerët e dy institucioneve që kanë të bëjnë me sigurinë u kthyen për raportim pas një ore, por pa opozitën.
Me prezencën e vetëm deputetëve të Lëvizjes Vetëvendosje, partisë në pushtet, raportimi u karakterizua me pak pyetje e më shumë me përgëzime për aksionin në veri.
“Në emër të komisionit shpreh mirënjohje edhe për Policinë e Kosovës, edhe për vendimet e mira, të drejta që ministria dhe Qeveria ka marrë në raport me zbatimin e reciprocitetit”, ka deklaruar deputeti i VV-së Enver Dugolli, nënkryetar i Komisionit.
Nëse gjërat nuk do të shkonin sipas planit, ministri Sveçla tha policia ka pasur një zgjidhje të dytë.
“Ne kemi qenë të përgatitur logjistikisht që edhe fizikisht t'i largojmë barrikadat e vendosura në këto dy rrugë”, ka thënë Sveçla.
Drejtori i përgjithshëm i Policisë shpjegoi mënyrën e organizimit të operacionit 14 ditor në Jarinjë e Bërnjak.
Por Mehmeti nuk pati përgjigje kontrete kur gruaja e Rexhep Selimit, deputetja Shqipe Mehmeti – Selimi e pyeti për kërkesën e Gjykatës Speciale nëse Policia mund të ofrojë garanci për lirimin me kusht të të paraburgosurve në Hagë.
“Unë u përgjigja që avokatët mbrojtës kanë bërë kërkesa për kushtet për lirim me kusht. Ne i kemi dërguar kapacitetin dhe aftësinë tonë dhe mundësinë tonë për me siguru lirim me kusht. Ndërsa sa i përket çështjes rreth dhomave të specializuara kisha pas dëshirë që të na kurseni dhe pyetjet t'ua bëni Dhomave të Specializuara”, u shpreh Mehmeti.
Pas mbledhjes, duke folur për tensionet me kryetarin e komisionit, ministri Sveçla tha se nuk dëshiron të bëhet pjesë e lojërave, siç i quajti politike.
Derisa, drejtorin e policisë e konsideroi pjesë të ekipit të tij.
“Jo vetëm drejtorin e policisë, edhe drejtorin e Agjencisë për Regjistrimin Civil edhe drejtorin e Akademisë të Kosovës për Siguri Publike edhe drejtorin e Agjencisë së Forenzikës”, shtoi Sveçla.
Raportimi i Sveçlës dhe Mehmeti u bë dhjetë ditë nga tërheqja e policisë nga veriu i vendit, pas arritjes së marrëveshjes ndërmjet Kosovës dhe Serbisë në Bruksel.
© KOHA. Të gjitha të drejtat janë të rezervuara.
