Video

Familjarët më të lehtësuar pas rivarrosjes së nëntë viktimave të masakrës së Rezallës

Për herë të fundit në 22 vjet, Aziz Hoti po viziton varrin e zbrazët të dajës së tij, i cili është një nga viktimat e masakrës së Rezallës.

Kjo pasi eshtrat e Jonuz Rukollit janë në mesin e nëntë viktimave që do të rivarrosen të shtunën në këtë fshat të Skenderajt, një javë pasi u kthyen nga varreza masive në Kizhevak të Serbisë.

Tani, Hoti thotë se ndihet më i lehtësuar.

“Fatmirësisht që është gjet dhe e dimë bile ku i ka eshtrat. Tash e kemi pak më lehtë, megjithëse nuk e kemi lehtë fare, por e dimë ku me ardhë se ky deri më tani ka qenë varr i zbrazët”, ka thënë ai.

Në mesin e shumë të pranishmëve, ushtarët e FSK-së nisin procedurat e rivarrimit.

Mes lotëve e dhimbjeve, familjarët u japin lamtumirën e fundit më të dashurve të tyre.

“Ndihemi shumë më të lehtësuar se për 22 vjet sikur kur rrinë njeri vjerrë, as tokë e as qiell. Do të thotë që mendja dhe shpirti kanë qenë jo të qetë. Nuk kanë mujt kurrë që të mendojnë se kur do të gjenden, duke mendu se ose kanë shpëtu ose gjenden diku”, shprehet Tahir Deliu, familjar i viktimave.

Me kthimin e 7 trupave dhe dy ribashkimet e eshtrave nga Kizhevaku, në kompleksin memorial të Rezallës tani pushojnë eshtrat e të gjithë viktimave të masakrës së këtij fshati.

Ceremonia e rivarrimit u organizua nga Komuna e Skenderajt, në të cilën mori pjesë kryeministri Albin Kurti dhe zyrtarë të tjerë shtetërorë.

“Këto varre këtu janë e vërteta, dëshmi e gjenocidit të Serbisë në Kosovë. Jemi bashkë për t’i nderuar sot dëshmorët e martirët e Kosovës. Nuk do të ndalemi derisa të sjellim drejtësi për ta”, ka thënë Kurti.

“Këto masakra, këto arkivole janë arkiva e cila argumenton se kush ishin kriminelët e vrasësit. Ne ishim viktima, ne ishim në të drejtën tonë, në tokën tonë. Akoma kriminelët e kësaj masakre dhe të tjerave nuk kanë dalë para drejtësisë”, ka deklaruar Bekim Jashari, kryetar i Skenderajt.

98 civilë shqiptarë u vranë në Rezallë nga ushtria serbe më 5 prill të vitit 1999. Disa ditë më vonë, forcat serbe kishin zhvarrosur një pjesë të trupave për t’i transportuar ata në Serbi.