Tre përfaqësues të Zyrës së Prokurorit të Specializuar kanë prezantuar fjalën hyrëse në gjykimin kundër drejtuesve të OVL të UÇK-së, Hysni Gucati e Nasim Haradinaj. Përderisa të akuzuarit u deklaruan të pafajshëm, kryeprokurori Jack Smith bëri një adresim të gjatë ku tha se të akuzuarit kanë bërë përpjekje të forta për ta penguar drejtësinë. Smith foli për pretendimet e tij se të akuzuarit shpërndanë në mënyrë të jashtëligjshme materialin konfidencial, por nuk dha detaje për atë se si rrodhi materiali konfidencial nga zyra që e udhëheqë vetë ai
Kryeprokurori dhe dy prokurorë të Zyrës së Prokurorit të Specializuar kanë lexuar për rreth tri orë përmbajtjen e akuzave e dyshimeve që rëndojnë mbi dy drejtuesit e Organizatës së Veteranëve të Luftës së UÇK-së, Hysni Gucati e Nasim Haradinaj, për pengim të drejtësisë. Në seancën e parë të mbajtur të enjten në Hagë, Gucati, gjatë deklarimit të tij tha se “jam plotësisht i pafajshëm”. Kurse, Haradinaj deklaroi se aktakuzën s’mund ta kuptojë, por atë që u lexua e ka kuptuar. Edhe ai e ka konsideruar veten plotësisht të pafajshëm.
Pas deklarimit të tyre, kryeprokurori Jack Smith filloi leximin e fjalës hyrëse.
Foli për të vërtetat në raport me Gjykatën Speciale të kosovarëve sipas bindjes së tij.
“E vërteta e parë është se ekziston një grup i vogël, por i fuqishëm njerëzish në Kosovë, të cilët nuk e duan ekzistencën e kësaj gjykate dhe të cilët do të bëjnë gjithçka për ta dëmtuar, por pa pasur sukses në orvatjen e tyre për ta shpëtuar idenë e rreme se asnjë ushtar i UÇK-së nuk ka kryer krime gjatë luftës”, ka thënë kryeprokurori Jack Smith, i cili ka vazhduar për disa minuta në këtë frymë.
“Siç e dinë mirë, ata që janë kundër kësaj gjykate, çështjet e paraqitura nga zyra që unë drejtoj dhe faktet që do të dalin në dritë në gjyqet e zhvilluara në këtë sallë, nuk do të lënë asnjë dyshim se kjo ide nuk është e vërtetë, por kjo ide e rreme është aq e rëndësishme saqë disa udhëheqës të caktuar të UÇK-së do të bëjnë çmos, gjithçka, që të pengojnë daljen në dritë të informacioneve që tregojnë se kjo është e vërtetë. Këta të akuzuar janë pjesë e këtij grupi dhe duan që kjo gjykatë të çmontohet në çdo mënyrë”, ka shtuar më tutje ai.
Por, Smith nuk ka folur për një të vërtetë tjetër shumë të rëndësishme. Atë se si përfunduan dokumentet e zyrës që ai drejton te të akuzuarit Haradinaj e Gucati.
“Të akuzuarit akuzohen për shpërndarje të paligjshme të këtyre dokumenteve, por jo për vjedhjen e tyre. Që të jemi shumë të qartë, jemi duke e hetuar aktivisht vjedhjen e dokumenteve në fjalë dhe kur të kemi grumbulluar prova të mjaftueshme kundër personave që e kanë bërë, këta individë do të arrestohen dhe të dalin në këtë sallë gjyqi për t’u përballur me akuzat për krimet e tyre. Duke qenë se bëhet fjalë për një hetim të veçantë e konfidencial që është duke u zhvilluar, nuk do të përmend sot asnjë prej hollësive lidhur me ecurinë e tij”, ka thënë ai.
Pas tij, fjalën e ka marrë prokurorja Valeria Boliqi.
Ajo ka thënë se të akuzuarit kanë tentuar të pengojnë punën e drejtësisë përmes disa videove të mediave kosovare e ku flisnin Gucati e Haradinaj, pasi kishin pranuar dosjet konfidenciale të Speciales.
“Me datën 6 shtator 2020, një person shkon në OVL me disa kuti, të cilat i la në korridor dhe largohet. Më pas, i akuzuari Haradinaj organizoi konferencën e dytë për medie për të hapur materialin e marrë nga personi i paidentifikuar”, është shprehur ajo.
E sipas kryeprokurorit Jack Smith, zyra që ai drejton nuk do të pushojë asnjë çast, e këtë duhet ta bëjnë për hir të viktimave dhe dëshmitarëve, që besojnë se ky institucion do të vendosë në vend drejtësinë.
Smith ka deklaruar se menjëherë pas ngjarjes kur u mbajt konferencë për media nga të akuzuarit, doli për të lavdëruar etikën e gazetarëve kosovarë që nuk pranuan t’i përhapin e se disa gazetarë në forume publike pranuan se përhapja ishte krim dhe kanë folur se si aktivitete të tilla e cenojnë shtetin ligjor dhe vënë në rrezik drejtësinë.
“Në planet e tyre, të akuzuarit nuk e kanë llogaritur mirë se si do të trajtonte këtë media e Kosovës, do të paraqesim prova se si Haradinaj ka kritikuar mediat për mospublikim”, ka thënë ai.
Gucati dhe Haradinaj akuzohen se në prill dhe shtator të vitit 2020 bënë deklarata akuzuese për dëshmitarë që bashkëpunojnë me ZPS-në dhe për persona të tjerë, duke i quajtur ata, ndër të tjera, gënjeshtarë, bashkëpunëtorë dhe tradhtarë. Ata akuzohen edhe se shpërndanë pa autorizim informacion konfidencial dhe jopublik në lidhje me hetimet konfidenciale të Task Forcës Hetimore Speciale (‘TFHS’) dhe ZPS-së, inkurajuan të tjerë të shpërndanin më tej informacion konfidencial dhe jopublik.
Seanca e radhës në këtë proces do të jetë më 18 tetor, kur do të fillojë dëgjimi i dëshmitarëve.
-
Nga: Saranda Ramaj
-
7 tetor 2021 21:07
-
Shpërndaje në: