Dëshmitari 3 thotë se u rrah një herë nga Mustafa, e që një ushtare e la me pasoja
1
Ka përfunduar dhënien e dëshmisë në Hagë edhe dëshmitari i tretë kundër ish-eprorit të UÇK-së, Salih Mustafa – Cali.
Ndonëse një pjesë e dëshmisë nuk është transmetuar për media, ky dëshmitar e ka përfshirë edhe në mënyrë direkte e edhe indirekte të akuzuarin- komandant Calin.
Një herë ka pohuar që e ka rrahur vetë ai.
“Jo ka mujt me qenë aty, por nuk me ka rrahë. Ai veç në fillim më ka rrahë. Herëve të tjera me kanë rrahë veç koleget e tij”, ka deklaruar Dëshmitari 3.
Të pranishme në rrahje pretendon që kanë qenë edhe dy ushtare. Njëra nga to thotë ta këtë rrahur, e pasojat e rrahjes së saj po i vuan edhe sot.
“E di që kanë qenë dy femra aty, bile si pasojë e njërës vuaj ende, kam shenjë prej saj, kur s’na kanë marrë në pyetje ato, na kanë marrë këta të tjerët, po ajo në atë rast ndodhi dhe e kam një shenjë prej një femrës aty”, ka shtuar dëshmitari.
Gjatë kësaj seance dëshmitari u është përgjigjur pyetjeve të mbrojtjes së viktimave, avokatit të të akuzuarit e trupit gjykues.
Pyetjet e para kanë qenë nga Annie Pues, nga Zyra për Mbrojtjen e Viktimave. Ajo është fokusuar te pasojat që ka pasur ky dëshmitar pas mbajtjes për 17 net në kampin e pretenduar në Zllash.
“Na treguat që jeni vizituar edhe te mjekë të tjerë, çfarë procedurash apo çfarë lloj trajtimesh kanë ndjekur këta mjekë dhe a kanë qenë të lidhura me lëndimet që keni pësuar në Zllash”, ka pyetur Pues.
E dëshmitari ka thënë se është detyruar të mjekohej privat, për shkak që UÇK-ja, siç ka thënë ai, pas luftës kishte uzurpuar çdo gjë, përfshirë, siç ka shtuar, edhe shëndetësinë publike.
“Jam munduar ma shumë me shku privat, shkaku që edhe me shku kshtu te mjeku s’ki mujt m’i thon ni mjekut që më ka torturu UÇK ose diçka edhe ma shumë në mënyra private veç me kry punë. Ma shumë jam shku nëpër njerëz privatë, nëpër mjekë privatë, shkaku edhe s’ke mujt me shku m’i thon m’ka dëmtu UÇK s’të ka besu kërkush, te na o ndryshe, osht ndryshe mentaliteti, larg Evropës janë këto gjana, shumë shumë larg jemi me mentalitet. Fatkeqësisht një pjesë e shoqnisë jemi shumë larg me mentalitet. Me pasë shku bon vaki i ke pasë edhe kta të UÇK-së, se i kanë pas të uzurpume aty ambulantat, kta jonë konë vetë zot aty”, është përgjigjur dëshmitari.
E nga avokati i Mustafës, Julios Von Bone, ky dëshmitar i Prokurorisë është lutur specifikisht ta përshkruajë komandantin që pretendon se e kishte mbajtur të mbyllur në stallë për me shumë se dy javë, e dëshmitari është shprehur i bindur që ishte Komandant Cali, anipse nuk ka dhënë detaje se si e ka mësuar.
“Këtë komandantin që thoni se e keni parë, a mund ta përshkruani?”, ka kërkuar avokati Julios Von Bone.
“Po qysh me ua përshkru. Është i akuzuari yt që po e mbron ti. Ka qenë veç ndoshta pak ma i dobët. Shumë e thjeshtë.
E nga gjyqtarja Mappie Feldt Voglia ai është pyetur nëse kishte parë edhe të tjerë persona që ishin mbajtur në këtë qendër si ai. Dëshmitari ka deklaruar se në atë stallë që e ka përshkruar si hapësirë me madhësi të një dhome, e me lartësi të vogël ishin 6 persona, por se ishte i sigurt që edhe në hapësira të tjera përreth po mbaheshin të tjerë persona, që ky vetë nuk i kishte parë, por ka deklaruar se ka dëgjuar britmat e tyre.
“Ka pasë edhe njerëz të tjerë se u nijshin bërtitmat e të tjerëve. Jam i sigurt që ka pasë edhe njerëz të tjerë”, ka shtuar dëshmitari.
Gjykimi ndaj Mustafës do të vazhdojë javën e ardhme. Ai ka qenë udhëheqës i njësisë BIA, e cila ishte në kuadër të Brigadës 153. Mustafa është personi i parë që po gjykohet në Hagë.
