Marrëveshja për targat me Serbinë ka përplasur edhe në Kuvend pushtetin e opozitën.
Marrëveshjen e arritur në Bruksel PDK-ja e LDK-ja e cilësuan si një hap drejt Asociacionit të komunave me shumicë serbe.
“Qeveria aktuale marrëveshjen e parë që e bën me Serbinë është marrëveshja për pranimin e targave ilegale si targa zyrtare në territorin e Kosovës. Kjo çfarë keni bërë ju është humbje për Kosovën. Qeveria e Serbisë lëshon zyrtarisht të pranuara nga Kosova, targa për Kosovën, çka është kjo? A është Zajednica, çka është? Këtu ka nevojë të sqarohet se çfarë keni pranuar ju”, ka thënë Arben Gashi, deputet i LDK-së.
Kritikë u tregua edhe deputeti i PDK-së, Abelard Tahiri.
“Çdo vendim i Qeverisë që është karshi Serbisë, ne e përkrahim. Mirëpo çka ndodhi 2 java. Për dy dekada, Serbia ka lëshuar targa ilegale për qytetarët e saj. E çka bën Qeveria e Kosovës, arritur në një marrëveshje të dëmshme, e cila legalizon targat GL, PZ, PR, që Serbia i lëshon për qytetarët e saj. Pra këto targa lëshohen nga Kosova për qytetarët e saj”, ka thënë ai.
Por zëvendëskryeministri Besnik Bislimi e arsyetonte marrëveshjen e arritur në Bruksel.
“Do të krijohet një grup punues i përbërë nga përfaqësues të BE-së, Beogradit dhe Prishtinës, të kryesuar nga BE-ja do të formohet për të gjetur një zgjidhje përfundimtare rreth targave, bazuar në standardet dhe praktikat e BE-së. Takimi i parë i këtij grupi do të mbahet më 21 tetor 2021 në Bruksel. Brenda gjashtë muajve nga takimi i parë, grupi punues do të paraqet të gjeturat për zgjidhjen përfundimtare para përfaqësuesve të nivelit më të lartë në procesin e dialogut”, ka thënë Bislimi.
Kryeministri i Kosovës, Albin Kurti, paralajmëroi edhe masa të tjera të reciprocitetit karshi Serbisë.
Ndërkaq opozita paralajmëroi edhe shfrytëzimin e mjeteve demokratike të tjera për të ndaluar Qeverinë të marrë vendime të tilla.
© KOHA. Të gjitha të drejtat janë të rezervuara.
