Ditë më parë, Gjykata Themelore në Ferizaj, me kërkesë të prokurorit të rastit, ka marrë vendim që ta lirojë në arrest shtëpiak personin që në qershor të këtij viti, në fshatin Koshare, kishte shkaktuar një aksident në trafik, nga i cili humbën jetën pesë anëtarë të një familjeje nga Shtimja.
Për ta kundërshtuar vendimin për ndryshim të masës së paraburgimit, familjarë e qytetarë të Shtimes të premten kanë organizuar një protestë paqësore nën parullat “Duam drejtësi”.
Shqipërim Ramadani, familjar i viktimave, ka thënë se janë jashtëzakonisht të zhgënjyer me këtë vendim të gjykatës.
“Në emër të familjes Ramadani, Latifi dhe Hyseni ngrehim zërin e protestës ndaj vendimit të Gjykatës dhe Prokurorit për lirimin e personit, i cili shkaktoi aksidentin ku humbën jetën 5 anëtarët e familjes sonë. Jemi thellësisht të zhgënjyer me vendimin për lirim”, ka deklaruar Ramadani.
Si pasojë e aksidentit të vdekur kishin mbetur katër persona: N.R. 39-vjeçar, XH.R. 60-vjeçare, S.R. 32-vjeçare dhe Y.R. 12-vjeçar. Disa ditë më pas kishte vdekur edhe familjarja tjetër, I.R. 32 vjeçare, e cila pas aksidentit ishte shtruar në QKUK, por nuk kishte mundur t’u mbijetonte plagëve.
Për mënyrën e trajtimit të këtij rasti nga organet e drejtësisë, familjari tjetër i viktimave, Imer Ramadani, dyshon të ketë pasur ndërhyrje.
“Është problem pse autopsia e pesë personave, katërve është shku menjëherë e bash e shoferit është vonuar qe 3 muaj e gjysmë, nuk është shkuar ende autopsia te prokurori, është vonuar veç ajo. Pse është vonu vetëm ajo, çka ndodhi aty, a ka ndërhyrë dikush në mjekësi ligjore a ka ndërhyrë në drejtësi apo çka ka pasur këtu probleme, qato më kanë shty deri tek organizimi i kësaj proteste”.
Vendimet e tilla të gjykatës, Ramadani thotë se inkurajojnë veprime të papërgjegjshme në trafik.
“Me kon të bisedosh thotë, për qeshtu me shku me i mbyt 5 veta e te shpija me prit burgun unë se kam problem hiç”.
Për të bashkëndier me familjarët, në protestë kishte dalë edhe Veli Beha, xhaxhai i njërit prej dy tetëvjeçarëve të cilët në maj të këtij viti, në Shtime, ishin goditur për vdekje nga një veturë gjatë kohës sa kishin qenë duke ecur në trotuar.
“Dhimbjen e kemi ndarë së bashku me këta njerëz, mirëpo edhe gjyqësia le ta thotë fjalën e vet. Mendoni tash kur njerëzit ende lotojnë, e ata që kanë shkaktuar të keqen enden dhe dalin në liri. Kjo është një dhimbje, një plagë, e cila nuk lë shërim”, është shprehur Beha.
Qytetarët kanë paralajmëruar edhe protesta të tjera në rast se Gjykata dhe Prokuroria nuk reflektojnë.
© KOHA. Të gjitha të drejtat janë të rezervuara.
