Rruga mbetet e bllokuar, Serbia lëviz ushtrinë përreth kufirit
1
Mjete të rënda ushtarake të cilat mund të shiheshin nga ana e Kosovës ka vënë në lëvizje Serbia përreth kufirit në ditën e shtatë të bllokadës në Jarinjë.
Ndërkaq, pjesëtarë të xhandarmërisë serbe kanë lëvizur përreth kufirit prej ditës së parë të bllokadës.
Pika kufitare vazhdon të ruhet nga pjesëtarët e Njësitit Special të Kosovës. Në disa pjesë, distanca mes tyre dhe xhandarëve serbë të cilët vëzhgojnë njëri-tjetrin me dylbi është rreth 800 metra.
Kjo është pika e fundit prej së cilës policët kanë thënë se nuk zhvendosen, rrjedhimisht nuk do të lejohet as zgjerimi i perimetrit të barrikadës.
E ato që tashmë janë vendosur pengojnë qarkullimin e automjeteve.
Resurset e strukturave ilegale janë vënë në shërbim të bllokadës. Barrikadat janë krijuar edhe me vetura të distributorit të rrymës nga Serbia, Elektrokosmet. Kjo ndërmarrje operon ilegalisht në Kosovë.
Ka edhe kamionë të ndërmarrjes komunale të mbeturinave, që po ashtu operon në veri.
Disa shtëpi ndodhen edhe afër brezit kufitar, që sipas policisë, andej ekzistojnë rrugët e kontrabandës.
Një kafe pranë pikës së kufirit ku qëndrojnë disa persona është paralajmërim për grupet e protestuesve që shfaqen më pas.
Ngritja e temperaturave ka bërë që shumë prej tyre të vendosen nën hije të pemëve. Gjurmë të objekteve të djegura në ditët e para të bllokadës vërehen ende. Motor i druve me një shishe benzinë qëndronte ende në njërën prej tendave të vendosura. Vajzat dhe gratë dominojnë më shumë në protestë. Disa bëjnë zemrën e disa ngritin tre gishta para kamerës.
Nuk dëshirojnë të flasin për media shqiptare me arsyen se nuk do t’u publikohet gjitha ajo çfarë thonë.
Pak metra tutje bëjnë edhe fotografi.
E ata që kalojnë kufirin në këmbë ndalohen dhe pyeten nga Policia e Kosovës për destinacionin.
Një kolonë me emigrantë nga Siria u shfaq të dielën, e të cilët marshonin mes hekurudhës. Destinacion i tyre është Serbia.
Policët që thonë se kjo është kolona më e gjatë me emigrantë gjatë këtyre ditëve sa janë duke vëzhguar, u japin edhe ujë.
Prezente vazhdojnë të jenë edhe auto-ambulancat.
Pas mesditës në Jarinjë shfaqet edhe një polic i uniformuar që në krah mban logon e UNMIK-ut. Ai refuzon të deklarohet për qëllimin e pranisë së tij në pikën kufitare. Por, gjatë bashkëbisedimit me pjesëtarin e policisë, dëgjohet duke thënë se "është mirë që gjithçka të përfundojë paqësisht".
Ndërkaq, dy persona me maska të zeza në pikën më të lartë nga ana e Serbisë kanë vendosur të dielën edhe një flamur të Rusisë, krahas atij serb.
Kjo është dita e shtatë e protestës së serbëve të cilët bllokuan pikat kufitare në Jarinjë e Bërnjak, pas vendosjes së reciprocitetit në targa.
