Për aq kohë sa rrugët për në dy pikat kufitare vazhdojnë të jenë të bllokuara, Njësia Speciale e Kosovës nuk do të largohet nga veriu.
Ka qenë ky paralajmërimi i kryeministrit Albin Kurti si përgjigje ndaj kërcënimit të presidentit serb, Aleksandar Vuçiq, për tërheqjen e policisë nga Jarinja e Bërnjaku.
“Cilësimet e tij për veprimet tona nuk janë të drejta dhe në anën tjetër vërejta që ka shumë inat, shumë vrerë që nuk i kontribuon deeskalimit të situatës. Nuk e di se për çfarë masash të Serbisë ndaj Kosovës e ka fjalën”, tha Kurti.
Gjatë mbledhjes së Qeverisë, Kurti ka thënë se Kosova, banorët e saj serbë dhe as Serbia nuk kanë interes për përshkallëzim të situatës. Një dëshirë të tillë, sipas Kurtit, e ka vetëm Vuçiqi.
Për largimin e reciprocitetit ai ka thënë se ka vetëm një rrugë.
“Jam i gatshëm që në çdo kohë këtë masë ta heq nëse kemi një zotim të tillë edhe nga pala e Serbisë. Pra nuk është që ne i gëzohemi tabelave të përkohshme, ne do të dëshironim që as Serbia e as Kosova të mos kenë fare tabela të përkohshme... Ne jemi të gatshëm për takime, bisedime për këtë çështje”, tha ai.
Kurtit i është kundërpërgjigjur drejtori i së ashtuquajturës Zyrë për Kosovën në Qeverinë e Serbisë, Petar Petkoviq.
“Si po mendon Kurti të bisedojë derisa drejt popullatës civile ka drejtuar pushkët e gjata, mjetet e blinduara, snajperët dhe gazin lojtsjellës. Kompromiset mund të arrihen në bisedime, por jo me politikë agresore e dhunuese të Prishtinës”., tha Petkoviq.
Kryeministri i ka ftuar qytetarët serbë që të tërhiqen nga bllokimi i rrugëve. Kurse ka thënë se nuk do ta ndëshkojë zëvendësin e tij serb, Goran Rakiq, i cili ka qëndruar bashkë me protestuesit si formë mbështetjeje ndaj tyre.
“Me aq sa jam informuar dhe që më ka treguar ai besoj që është përpjekur që situata të mos eskalojë, të mos ketë veprime të dhunshme dhe nuk mendoj te marrë masa ndaj tij”, deklaroi kryeministri i Kosovës, Albin Kurti.
Të hënën Qeveria vendosi reciprocitet me Serbinë për targat. Për të hyrë në Kosovë automjetet tani e tutje duhet t’i heqin apo t’i mbulojnë targat e Serbisë dhe t’i zëvendësojnë ato me targa të përkohshme të Republikës së Kosovës.
© KOHA. Të gjitha të drejtat janë të rezervuara.
