ROSU në Jarinje, serbët bllokojnë rrugën për në pikën kufitare
1
Revoltë te serbët e Veriut ka shkaktuar vendimi i Qeverisë së Kosovës për aplikimin e reciprocitetit në targat e veturave. Me automjete të llojeve të ndryshme, dhjetëra serbë kanë bllokuar rrugën që dërgon te pika kufitare në Jarinje, për të kundërshtuar praninë e njësisë speciale të Policisë së Kosovës, e cila po mbikëqyrte zbatimin e këtij vendimi.
Protestuesit janë mbajtur nga policia rreth një kilometër larg pikës kufitare. Situata është vëzhguar nga pjesëtarë KFOR-it, derisa kohë pas kohe zona monitorohej me helikopter. Në një kodër të lartë vëzhgonte edhe dikush.
Bashkë me protestuesit kanë qëndruar zyrtarë të Listës Serbe. Goran Rakiqi tha se populli serb është i frikësuar nga prezenca e Policisë së Kosovës.
“Ky nuk është aksion, por është reaksion, populli është i frikësuar. Bisedimet nuk janë tavoline suedeze për të marrë çkado”, tha Rakiq.
Me britma e sharje është përcjellë ardhja e pjesëtarëve të policisë nga fillimi i kolonës, deri kolegët e tyre.
Një bashkëbisedim me serbët e mbledhur e ka bërë zyrtari i Listës Serbe, Igor Simiq, rreth orës 16. Ndërsa më pas, ai tha para mediave se kanë të drejtë të protestojnë në mënyrë paqësore, derisa ka shtuar se njerëzit kanë nevojë për lëvizje të lirë.
“Këta duhet me qëndru të qetë (qytetarët) mos me ra pre e provokimeve që nuk po dihet se kush i ka nxit. Dikush ka qëllim që të shkaktohen trazira në Veri. Ju po e shihni që personat janë të revoltuar, kurrkush nuk po ka qef me nejtë këtu me qëndru në këto barrikada po e shihni që policia po qëndron pranë shtëpive familjare sidoqoftë ne e porosisim Brukselin dhe të tjerët se duam të jetojmë një jetë normale siç ka qenë jeta para vendimit të sotshëm", tha Simiq.
Ndërprerja e qarkullimit ka shkaktuar kolona edhe në anën e kufirit nga Serbia. Kjo ka bërë që serbët të kalojnë në këmbë brezin kufitar.
Më 15 shtator ka skaduar marrëveshja e vitit 2016, e cila ishte vazhdimësi e asaj të korrikut të 2011-s, e arritur në kuadër të dialogut teknik ndërmjet Kosovës dhe Serbisë, e cila parashihte që qytetarët me targa të Kosovës të pajiseshin me targa të përkohshme kur hynin në Serbi.
