I papranueshëm po konsiderohet nga disa banorë të fshatit Miradi e Epërme të Fushë-Kosovës vendimi për rrënimin e një objekti që kishte shërbyer si Shtëpi e Kulturës. Ata thonë se ky ka qenë objekti i vetëm i vjetër gati njëshekullor që ka mbetur aty, pas rrënimit më herët të xhamisë dhe shkollës.
Disa prej tyre, prapa kamerës kanë deklaruar se vendimi për rrënim nuk ka qenë në rregull dhe se kjo po ndodh me qëllim që të përfitojnë zyrtarë të caktuar komunalë.
Vlonjat Hasani, banor i këtij fshati dhe kandidat për Kuvend Komunal nga radhët e Vetëvendosjes, thotë se në vazhdimësi kanë kërkuar nga pushteti komunal që ta restaurojë këtë objekt dhe ta funksionalizojë, në mënyrë që banorët dhe rinia të kenë ku t’i zhvillojnë aktivitetet kulturore.
“Rëndësia e këtij objekti është e veçantë, për shkak se ky objekt ka funkionuar edhe në masat e dhunshme të pushtetit të kaluar të regjimit serb. Në kohën kur të gjitha aktivitetet u patën ndaluar nëpër objektet publike, yjet e estradës tonë, artistët e vendit kanë performua dhe i kanë mbajtur programet e tyre pikërisht në këtë objekt”, ka thënë ai.
Ai thotë se Kuvendi Komunal e ka marrë vendimin për rrënim pa i konsultuar banorët. Sipas tij, ky vendim do të kishte njëfarë kuptimi, nëse në të njëjtin vend do të ndërtohej objekti i ri i Shtëpisë së Kulturës.
Në anën tjetër, zëdhënësi i Komunës Ali Topalli, thotë se në prill të këtij viti Kuvendi Komunal ka marrë vendim për rrënimin e disa objekteve të vjetra nëpër fshatrat e Fushë-Kosovës.
“Ato janë objekte të vjetra, janë jashtë përdorimit, jashtëfunskionale dhe në to ka pasur vetëm grumbullim mbeturinash, ka pasur do të thotë rrënoja, ka pas keqpërdorime të këtyre objekteve dhe nuk e kemi parë të arsyeshme që t’i lëmë më në atë gjendje”.
Topalli ka theksuar se tash për tash, në ato vende ku do të rrënohen objektet e vjetra do të mbesin hapësira publike, ndrëkohë që në të ardhmen do të shohin se a do të kenë mundësi financiare për të ndërtuar objekte të reja.
Hasanit thotë se aty nuk do të ketë kuptim asnjë objekt tjetër pos Shtëpisë së Kulturës, emrin e së cilës e mban edhe vetë rruga aty.
© KOHA. Të gjitha të drejtat janë të rezervuara.
