Opozita kritikon kryeministrin për deklaratat lidhur me arkivat e UÇK-së
1
Ndihmë për çështjen e të pagjeturve e ka cilësuar kryeministri i Kosovës hapjen e arkivave të UÇK-së.
Albin Kurti ka thënë se është pro që arkivat e Beogradit të hapen
“Ne i kemi arkivat e shtetit tonë të cilat i përfshijnë ato gjatë luftës së UÇK-së dhe ne jeni shumë transparentë. Mirëpo, neve na duhet ta zbardhim fatin e të pagjeturve, e për këtë ne duhet të hapim arkivat në Beograd, sepse vrasjet e varrosjet e masakrave e më pastaj zhvarrosjet nuk janë bërë nga qytetarët serbë, por nga shteti i Serbisë në mënyrë të organizuara, e që janë në arkivat e Serbisë që duhet të hapen një orë e më parë”, ka thënë Kurti.
Shefi i ekzekutivit po ashtu tha se “si Kosovë nuk kemi asgjë për të fshehur”.
Mirëpo, kundër këtij veprimi janë deklaruar partitë opozitare. Shefi i Grupit parlamentar të PDK-së, Abelard Tahiri, ka thënë se diskutimi për arkiva ka arritur nga Beogradi në Kosovë.
“Më duket një deklaratë e pabesueshme që deri dje është diskutuar në Beograd të diskutohet edhe në Kosovë. Në shumë procese është dëshmuar pastërtia e luftës së UÇK dhe e kemi obligim që t’i mbrojmë këto vlera. Do t’i shohim në vazhdimësi një tendencë të Serbisë që të hap tema të tilla”, u shpreh Abelard Tahiri.
Besnik Tahiri i AAK-së ka kërkuar nga Qeveria të merret me çështje të tjera e nga LDK-ja thonë se me këtë çështje duhet të merren ekspertët.
“Janë disa tema të këtij vendi që lidhen me historinë e lavdishme, e ajo është lufta për liri, që është vlera e këtij shteti. Qeveria duhet të ketë shumë kujdes kur flet për këtë temë, por ka tema të tjera që duhet të merren, siç është reciprociteti. Kjo është gabim substancial dhe duhet të kërkojë falje që është hapur kjo temë”, tha Besnik Tahiri.
“Çështja e arkivave nuk ka të bëjë me luftën e UÇK-së, por duhet një angazhim i ekspertëve për të parë këtë në mënyrë që mos gabohemi”, shtoi Arben Gashi, shef i Grupit parlamentar të LDK-së.
Ditë më parë, zëvendëskryeministri Besnik Bislimi njoftoi se në Bruksel janë dakorduar me Serbinë për hapjen e arkivave të dy shteteve. Më vonë Bislimi sqaroi se nga ky zotim është tërhequr pala serbe.
