Një valë e re e COVID-19 paralajmërohet në Kosovë gjatë vjeshtës, shkaku i variantit Mu.
Ky variant, që është përhapur në mbi 40 vende të botës, është më rezistues e më i rrezikshëm.
“Varianti Mu ka treguar në studimet e pakta që ekzistojnë deri tani, se është akoma edhe më ngjitës dhe më infektues sesa Delta dhe një fakt tjetër, se është më i fshehur sesa Delta. Kështu që, fakti që nuk e identifikojmë që në momentet e para te pacientët, e bën sëmundjen akoma më të rrezikshme dhe më vdekjeprurëse. Simptomat që shkakton varianti Mu nuk janë shumë tipike, janë të ngjashme me një ftohje shumë të lehtë, e cila nga momenti në moment përkeqësohet pa pasur mundësi, që mjeku ose edhe familjari, për të shtruar në spital dhe për t’u trajtuar në kohë”, ka thënë Aurora Dollenberg, kryetare e Federatës së Mjekëve Shqiptarë në Evropë.
IKSHPK-ja tashmë i ka dërguar 282 mostra për testimin e këtij varianti.
“Brenda IKSHPK-së nuk ka kapacitetet për sekuencionim të gjenomit të SARS-COV2 për këtë arsye ne mostrat në mënyrë të herëpashershme i dërgojmë jashtë Kosovës në laboratorët, me të cilët kemi marrëveshje për këtë qëllim. Më 6 shtator i kemi nisur 282 mostra të tjera për detektim të varianteve për sekuencionim që pastaj do të rezultojë me informata se çfarë variante tani janë në qarkullim e sipër”, ka njoftuar Xhevat Jakupi nga IKSHPK-ja.
Jakupi thotë se detektimi i këtij varianti nuk mund të kryhet, sepse ka mungesë të ekspertëve të kësaj fushe, por edhe të pajisjeve.
E gjatë 24 orëve të fundit 14 persona e kanë humbur betejën me COVID-19, derisa janë shënuar 583 raste të reja me të infektuar.
Në Qendrën “1 Tetori” në Prishtinë, vaksinimi ka vazhduar edhe të shtunën. Dyert e qendrave të vaksinimit do të jenë të hapura edhe të dielën.
Që nga fillimi i procesit, Kosova ka administruar mbi 1 milionë doza të vaksinës.
Prej tyre mbi 660 mijë qytetarë janë të vaksinuar vetëm me dozën e parë, ndërsa mbi 355 mijë të tjerë janë të vaksinuar me të dyja dozat.
© KOHA. Të gjitha të drejtat janë të rezervuara.
